465/2025-2026
Dated Aizawl the 6th May, 2025 : Vawiin chawhma dar 10:30 khan Tribal Research Institute, Art & Culture Department bul tumin Department of History, Govt.’ Aizawl West College leh Department of History, Pachhunga University College te tanghovin an buatsaih ni hnih chhung awh tur Mizo ei leh in chungchang zirchianna - ‘International Seminar On Mizo Foodways: Cultural Traditions, Societal Transformations, and Political Dimensions Across Time chu Government Aizawl West College-ah neih tan a ni a. Pu C. Lalsawivunga, Minister, Art & Culture department chuan Khuallian niin a hmanpui a, Seminar hi a hawng nghal bawk a ni.
Hawnna inkhawmah hian Khuallian Pu C. Lalsawivunga, Minister, Art & Culture Department chuan thu sawiin, ‘Zohnahthlak hnam hrang hrangte chu tlang hrang hrangah awm mahse, inkungkaih leh inphiarzawm tlat - Close-knit Society ni tura siam kan ni a, chu kan hnam ziarang nghet taka min phuarkhawmtu chu a bo hlauh chuan Mizo hnam pawh a thih ve palh mai a hlauhthawnawm thu a sawi a. Sechhun Khuangchawi leh a dangte avanga tlang hraia ruaitheh thin hnam khan Kristian kan nih hnuah Krismas leh kumthar ruaitheh kan uar chhunzawm a, lungthu pathum chunga eirel thin Mizo te kha chhiat that engkimah chawhlui kil ho thin an ni a, chu chu an inlaichinna ti nghet tu a ni tih sawiin, vawiin thlengin chhungkua, thenawm khawveng leh khawtlangah pawh chhiatni thatniah chawhlui kan la kilho zel a, kan la chhawmnung zel a ni a ti a. Kan ei rel dan te, kan ei ho dan te hmanga kan inpawhna leh inzawmnate chu kan khawtlang leh hnam tan chakna leh nghehna a ni a, chawinun zel tha a tih thu sawiin, chu chu kan khawtlang leh hnam tipumkhat tu leh tichak tu a ni reng dawn a ni’, a ti a.
Minister chuan seminar kaltlanga Mizo food culture zirchianna chuan kan nihphung, kan culture leh tradition kan zir leh hriatzauna kawngah rah tha tak a chhuah ngei a beisei ttih tarlangin, sawrkar pawhin Mizo tobul leh culture te chhui a, zirchiang turin Research Committee te pawh Chief Minister hmalaknain ama ho ngeiin din chhoh mek a nih thu a sawi a. Seminar pawh chu Tribal Research Institute, Art & Culture Department kaltlanga chung hmathlirte tihhlawhtlinna chu ni ngeia a hriat thu leh lawmawm a tih thute a sawi bawk a ni.
Seminar hawnna inkhawm hi Pu F. Lalthanmawia, Joint Director, Art & Culture Department chuan kaihruaiin, kalkhawmte lo lawmna thu a sawi a. Dr. Malsawmdawngliana, Asst Prof., Govt.’ Aizawl West College & Co-Ordinator, chuan report a pe a, Dr. Rohmingmawii, Associate Professor, Dept. of History, PUC and Co-Coordinator-in Seminar thupui sawi hawnna neiin Prof. C. Lalthlengliana, Principal, Government Aizawl West College pawhin thu sawina hun a hmang a. Pi Zirsangzuali, Senior Research Officer, Tribal Research Institute, Art & Culture Department chuan lawmthu sawiin hun hi a khar a ni.
‘Mizo ei leh in chungchang zirchianna’ - International Seminar on Mizo Foodways: Cultural Traditions, Societal Transformations, and Political Dimensions Across Time-ah hian thupui chi hrang hrang sawm pakhat (11) hmangin mithiam te chuan paper an present dawn a. Mizoram University leh College hrang hrang atangin mithiam rualten paper an present bakah hian Assam Global University, Guwahati; Duke University, North Carolina, US; East-West University, Chicago, US; Department of Sociology, University of Hyderabad; Department of Sociology, Tezpur University atang te in mithiam te paper ngaihthlak a, zirho a ni bawk ang a. Mithiam hrang hrangten thupui hran theuh nei a ‘Mizo ei leh in chungchang zirchianna’ hmanga thu an ziak sawm pali (14) te chu la khawmin lehkhabu-a buatsaih tum a ni bawk.
Seminar hi naktuk May 7, 2025 hian Govt Aizawl West College-ah chhunzawm tur a ni a, Seminar kharna inkhawmah hian Prof. Lalthanzara, Principal, Pachhunga University College chu khuallian a ni ang.
