464/2025-2026

Saitual, the 6th May, 2025: Vawiin chawhma dar 10:00 khan Saitual Bawrhsap Dr. Lalngura Tlau leh Saitual Superintendent of Police, Pu Gaurav Tyagi te chuan Saitual Hmar Venga One Stop Centre (OSC) te chu tlawhin an endik a, Pi Runremsangi, Centre Administrator, OSC chuan a lo dawngsawng.

He hunah hian District Bawrhsap Dr. Lalngura Tlau chuan thu sawiin, OSC chu hmeichhia hleilenna tawk leh baihvaite tluk luhna pawimawh tak a ni tih a sawi a, OSC-a thawktute chu an thawhrimna fakawm a tih thu a sawi bawk. Bawrhsap chuan OSC chu Health, Police leh Excise department te nen pawha thawhhona tha tak an neih a tul tih a sawi a, hmeichhia leh naupangte chunga hleilenna tihkiam a nih zel theih nan OSC staff te chu theih tawp chhuah zel turin a fuih nghal a ni.

Ministry of Women & Child Development, Govt. of India leh Social Welfare Department, Govt. of Mizoram atanga thupek dawn angin leh OSC Monitoring Committee-in a lo rel tawh angin, vawiin khan DC, SP, SDPO, OSC Nodal Officer te chuan OSC an endik a, endikna (inspection) report hi a hmunah ziah nghal a ni bawk.

Saitual District-a One Stop Centre hi Multi-Shopping Complex, DC Office Building hlui, Saitual Hmar Veng-ah a awm a, tunah hian Staff 13 an awm mek a. Staff zingah hian centre administrator, case worker, para legal personnel, counsellor, office assistant, multi-purpose worker leh security te an awm a ni. OSC-ah hian hmeichhia leh naupang harsatna tawk te chu ni 5 chhung an awm thei a, an awm chhungin an ei leh in te chu a thlawna pek vek an ni. OSC atang hian harsana tawk lo kal te chu an dinhmun azirin an chhungte inah emaw Shakti Sadan, Aizawlah emaw thawn thin an ni.

Vawiin OSC tlawh leh endiknaah hian, District Bawrhsap Dr. Lalngura Tlau, Pu Gaurav Tyagi, SP, Pu Lalthakima Chhangte, SDO(S), Pu Laltanpuia, SDPO, Pi F. Zodingpuii, DIPRO te an tel a, Pi Runremsangi, Centre Administrator, OSC leh OSC staff ten lo dawngsawngin inkawmhona hun an nei nghal a ni.