463/2025-2026

Siaha the 6th May, 2025: Samagra Shiksha, Siaha District buatsaihin Environmental Building Programme for Inclusive Education hnuaiah Orientation programme of Principals, Educational Administrators, Parents/Guardians etc chu vawiin chawhma dar 10 khan MADC Golden Jubilee Hall-ah buatsaih a ni a, Siaha tlawha cham mek Pi Vanlaldiki Sailo, State Commissioner for Persons with Disabilities, Govt of Mizoram chu Khuallian a ni.

Pi Vanlaldiki Sailo, State Commissioner for Persons with Disabilities chuan kalkhawmte chu chibai a buk a, vawiina a mah rawn ṭawiawmtu Mizoram in Indian Sign Language Interpreter (ISL) a neih Pi C Lalchhuanmawii (Chhuante-i) chanchin tarlanna a nei nghal. Mizoram SCERT hnuaiah kum tam tak a lo thawk tawh a, hun rei tak hnuah Zirtirtute nena inkawmhona an nei leh thei chu lunglenthlakin a ngaihlu hle a ti. Zirtirtu hna chu hna zahawm leh ropui tak a ni a, mi thiam leh ram leh hnam tana mi chhenfakawm tam tak chherchhuaktu an ni tiin an pawimawhna hre thar leh turin a chah a, khawtlang bakah Ram leh Hnam tan danglamna thlentu an ni tiin zirtirtu hna zahawmna humhimtu ni turin a chah bawk.

India Sawrkarin Rualbanlote a ngai pawimawh em em a, Sawrkar hun pawimawh leh thiltih kalphung engkim an hriat a, an hmuh ve theihna turin sawrkarin theihtawp a chhuah thin tih a tarlang. Mizoramah Rualbanlote tan zirna Special school a awm nual a ti a, Siaha District-ah Rualbanlote pual bik Zirna In a awm lo erawh pawi a ti hle tiin sawrkar kutah ringawt dah mai lova , mahni kut zala tla a ni tih hriain Pawl, Kohhran leh Khawtlang ang pawhin rilru leh ngaituahna seng theuh se a ti a, Rualbanloten zirna tha an hmuh ve chu an dikna chanvo a ni a, Sawrkar pawhin ngai pawimawh hlein Rights of Persons with Disabilities Act 2016 a duang hial a ni, a ti. Zirna mai bakah Employment-ah pawh za zela 4 (4%) chu an tan Sawrkarin a dah tlat tih tarlangin chung hamthatna awm te chu a dawngtu tur dik takin an dawn theih nan mipui hrilhhria a, hrilhchhangtu ni theuh turin a sawm. Rualbanlote an kut ke a ding thei tura buatsaih chu vawiina kalkhawmte mawhphurhna a ni a, mahni tu leh fa te, Kan mi leh sate thanlen zelna leh hmasawnna kawngah harh thar tul hle, a ti bawk.

Vawiina an kal chhan inclusive education chu Huapzo zirna a ni a, a thiam thei leh thiam theilo deuh te, zirna lama chak vaklo an tih te thlengin a huam vek a ni, a ti. Accessible India Campaign chu India ram pumah neih mek a ni a, Siaha khaw chhunga sawrkar building pawimawhte Rualbanlote thleng phak (Accessible) a ni em tih endik tura rawn kal an ni tel tibawkin kalkhawmte chu hun lo kal zel turah endikpuitu ni turin a sawm a, Rualbanlote chhawmdawltu, an dikna chanvo humhalh sak tlattu nih tum theuh theuh a sawm bawk a ni.

Orientation programme zawh hian State Commisssioner chuan District Hospital, Siaha leh DC Office, District Hospital, Siaha, DC Office, District Court Building, Govt Siaha College leh Govt Higher Secondary School te a endik nghal a ni.

Pi S Nupaw, APO ( IE) Samagra, Siaha chuan vawiin hun hi a kaihruai a, Pu JC Lalthansanga, BRCC Siaha Block chuan hunserh hmangin Pu KT Sema, DDPC, Samagra Shiksha, Siaha chuan inlawmna thu a sawi. Nula TC Vanlalhruaii hnen atangin special item thlirho a ni a, Resource Persons Pu R Lalmalsawma, Special Educator, DPO leh Pi Vanlallukhummawii, APO (MIS) ten Inclusive education chungchangah kalkhawmte hnenah zirtirna an nei bawk a ni.