5028/2025-2026

Dated Aizawl, the 28th March, 2026 : Urban Development & Poverty Alleviation (UD&PA) Department, Aizawl Smart City Limited (ASCL), Aizawl Municipal Corporation (AMC) leh Central Young Mizo Association (CYMA) tangkawp, Aizawl Khawpui Faina atana Coordination Committee buatsaih, ‘Aizawl Khawpui Faina Hnatlangpui leh City Branch YMA Fai Intihsiak’ chu tukin zing dar 7:30 khan Vanapa Hall kawtah a khuhhawnna (Kick-Off Programme) neih a ni a. He hunah hian Pu Lalmalsawma Pachuau, Commissioner & Secretary, UD&PA chu khuallian a ni.

Khuallian Pu Lalmalsawma Pachuau chuan thu sawiin, ram leh hnam hmangaihna kawngah Faina ngaih pawimawh a tulzia a sawi a. Mizo mipuite chuan mahni ram tia chhal tur kan nei chu thil hlu tak a ni tih hriain, a enkawl leh tihfai kawngah pawh mawhphurhna kan la tur a ni, a ti a. Fai chu thil hlawk tak a nih thu sawiin, ram pawn atanga Mizoram lo tlawhtute hiptu pawimawh tak leh ram economic value tisangtu pakhat chu Faina a ni, tih a sawi a. Faina ngai pawimawh zual zel turin kalkhawmte chu fuihin, ‘Aizawl Khawpui Faina Hnatlangpui’ leh 'City Branch YMA Fai Intihsiak' chu a hawng nghal a ni. 

Pu Joseph H. Lalramsanga, Municipal Commissioner, AMC chuan hun kaihruaiin, Prof. Malsawmliana, General Secretary, Central YMA chuan Faina kawnga hmalakna chu mimal intin thleng phak a nih theih nan inzirtirna uar deuh deuh a tul thu a sawi bawk a ni.

He hunah hian UD&PA, Aizawl Smart City Limited leh AMC-a thawktute bakah tlawmngai pawl hrang hrangte an tel a. Vanapa Hall kawta ‘Faina Hnatlangpui 2026’ khuhhawnna neih a nih zawh hnu hian Aizawl khawpui hmun hrang hrangah Faina Hnatlang neih zui nghal a ni.