5030/2025-2026

Dated Champhai, 28th March, 2026 : Vawiin khan Irrigation & Water Resources Department Secretary, Er. Lalrothanga chuan Champhai tlawhin IWRD hnuaia Pilot Project kalpui mek Modernisation of Command Area Development (MCAD) hnuaia Water User Society member te nen inkawm khawmna hun hlawkthlak tak neih a ni. He project in a tum angin loneitute’n tui hnianghnar zawka an neih theihna tura ruahmanna te sawikhawm niin, pump house leh solar plant dahna hmun tur te tlawhin en fel nghal bawk a ni. He MCAD project in a tum bulpui ber chu canal hmanga thlai tui kan pek hi a aia tui kan hman tangkai theih zawk na turin tihdan tha, hmanraw tha leh changkang (Pressurized Pipe Irrigation Network) hmanga thlak tum ani a, hei hian tui renchem zawk leh tangkai zawkin min hmantir thei anga, thlai thar chhuah a pun phah tur thu te a sawi bawk a ni.

IWRD Secretary chuan he MCAD project hlawhtlinna tura a bulpui ber chu loneitute (Water User Society member) an nih thu sawiin, project zawh a nih hunah pawh an ta anga enkawl chhunzawm zel turin a chah a, he project huam chhung tui hna kan neih ang ang te ti chhe lo leh ti buai lova hman tangkai dan leh rei tak hman dan in zirtir a theh darh pawimawh zia thu te a sawi a ni.

Tuna MCAD Pilot project hi a hlawhtling anih chuan, a ram pum huapa la kalpui chhoh zel tur anih thu sawiin, hei hian Mizoram, fur laia tui hnianghnar tak, thala tui khamkhawp hmu leh silo tan a tangkai tur thu te a sawi a bawk a ni.