5031/2025-2026

Dated Aizawl the 28^th March, 2026: UD&PA, Aizawl Smart City, AMC leh Central YMA tangkawp, Aizawl Khawpui Faina atana Coordination Committee buatsaih Faina Hnatlangpui 2026 chu March ni 28,2026-ah Lammual leh a chhehvel bakah Aizawl khawpui chhung YMA branch tam zawkah neih a ni.

Faina Hnatlangpui tanna hi zing dar 7:30 ah Vanapa hall kawtah neih niin, Pu Joseph H. Lalramsanga, Municipal Commissioner, AMC in kaihruaiin, Central YMA atangin Prof. Malsawmliana, General Secretary, CYMA in thu a sawi a, UD&PA Commissioner & Secretary Pu Lalmalsawma Pachuau chuan Faina Hnatlangpui tanna leh Aizawl City YMA Branch Fai Intihsiakna 2026 khuhhawnna a nei nghal a ni. Kick-off neih zawh hian tlawmngai pawl thenkhat leh Department ruat bik ten zingkar hnatlang hi Lammual leh a chhevel-ah an nei nghal a, Aizawl khawpui chhunga YMA branch tam zawkin remchan dan angin mahni veng theuhah Faina Hnatlangpui hi an zawm ve nghal a, chhiat tawhna avang leh rokhawlhna dang avanga YMA Branch hnatlang thei lo an awm bawk a, YMA Branch thenkhat nimin lama hnatlang an awm bawk a ni.

Faina Hnatlangpui pual hian bawlhhlawh tamna leh hmun bal zual lai 15 (sawmpanga) thlanchhuah niin, a hnaivaia awm YMA branch ten heng hmun tihfai hna hi an thawk nghal a, khua in a zir loh avangin Faina Hnatlangpui hi hmun tam takah a khaihlak a ni.

He Hnatlangpui hi Comprehensive Plan for Municipal Solid Waste Management in Aizawl tihhlawhtlinna tur pakhat anih bakah Aizawl khawpui hi India rama khawpui fai ber leh bawlhhlawh awmlohna Garbage Free Aizawl kan nih theihna tura hmalakna zinga mi a ni. Coordination Committee chuan Faina Hnatlangpuia tlawmngai pawl hrang hrang thawkchhuakte chungah lawmthu sawiin, Faina kawnga hmalakna hrang hrangah theihtawp chhuah chhunzawm zel turin a ngen a, YMA Branch tin te Aizawl City YMA Branch Fai Intihsiakna 2026-a Fai lawmman la thei theuh tura tan la thar theuh turin a ngen a ni.