5032/2025-2026

Dated Champhai, 28th March 2026: Fisheries Minister Pu Lalthansanga'n vawiin khan Keilungliah, Champhaia District Fisheries Development Office leh Keilungliah Reservoir Management Committee tangkawp buatsaih Nghakuai Chiah Runpui 2026 (Fish Festival) chu a khar a, he hunah hian khuallian niin sangha man tha te hnenah lawmman a sem bawk a ni.

Khuallian Pu Lalthansanga chuan Keiluangliaha hetiang hun tha tak sangha mantute tana buatsaih hi ropui a tih thu a sawi a, nakin zelah chuan nghakuai chiah bakah thil dang tam tak tih theihna atan Keilungliah hi buatsaiha thuamthuat zel tum a nih thu a sawi. Chutiang hmasawnna atan chuan mipui nena thawhho hi a pawimawh em em a, Champhai mipuite theih ang anga sawrkar hnathawh te tanpui turin a sawm a. Mizoramah sangha khawi nana hectare 4500 hman theihah 1000 chiah la hman tangkai a ni a, sangha khawitu pawh an la tam tawk lo a, Mizoram hian hmun dang atanga sangha lak ngai lo turin kan intung ding thei a ni tih a sawi a, tan la turin mipui a sawm a ni. Bana Kaih hnuaia tanpuina te, PMMSY hnuaia hamthatna te pawh a awm reng a, hmang tangkaia sangha dil tha tak siama tha taka eizawnna insiam thei turte tan chuan heng hamthatna hi lak ngei a that thu a sawi. Hetiang hun hi buatsaih zel theih ni se a tih a thu a sawi a, sangha mantu zawng zawng te'n an hlut ngei a beisei thu a sawi a ni.

He hun hi Fisheries Secretary Er. Lalrothanga'n a kaihruai a, District Fisheries Development Officer Pi Lalremsangpuii'n lawmthu sawiin kharna hun a titawp a ni. He huna lawmman dawngtute chu heng te hi an ni:

Biggest catch (sangha man lian ber)

1st - R. Lalhmingliana, Champhai Vengthar - 1.465 kg

2nd - Ramdawngliana Khiangte, Serchhip - 1.215 kg

3rd - H. Lalruatfela, Tuithiang - 1.075 kg

Most catches (sangha man hnem ber) - H. Lalruatfela, Tuithiang (6)

Youngest catch (sangha man naupang ber) - Lianthangpuia, Champhai Bethel - kum 11

Oldest catch (sangha man upa ber) and best woman angler (hmeichhia man tha ber) - Malsawmkimi, Zotlang, Aizawl - kum 44, 636 grams.