Vawiin khan Urban Development & Poverty Alleviation (UD&PA) leh Aizawl Municipal Council (AMC) huaihawtin I&PR Conference Hall-ah kawng hrang hranga Aizawl khawpui chak zawka hma a sawn dan tur ngaihtuahho a ni a. Meeting-ah hian Finance Minister Pu Lalsawta, Deputy Speaker Pu R.Lalrinawma, Parliamentary Secretary Lt.Col.Z.S. Zuala, MLA-Pu K.Sangthuama leh Pu Lalruatkima te bakah AMC Executive Councillor-te, tlawmngaipawl aiawhte, Department hrang hrang aiawh official-te an tel a ni.

Aizawl khawpui hi Jawaharlal Nehru Urban Renewal Mission (JNNURM) hnuaia hmasawnna hna thawhna tur khawpui a bika thlanchhuah mission city 63 zinga pakhat a ni a. Sorkar laipui Ministry of Urban Development in kaihhruaina a siam angin Aizawl City Development Plan (CDP) hi 2006-2007 khan siam a lo ni tawh a. He CDP rawtna ang hian project pathum - tui intur thianghlim pek, kawngpui siam leh mirethei chenna in sak te chu sorkar laipui atanga sum hmuh hmanga tihhlawhtlin mek a ni. Khawpui a thang chho va, a michengte an pung a, khawpui mamawh a lo danglam zel avangin CPD pawh ennawn, siamrem, paih then leh belh a ngai thin a. He khawpui chhunga chengte ngeiin Aizawl khawpui than zel dan tura an duhthusam chu CPD ah hian thailangin chumi mil chuan khawpui hmasawnna tur hmalaknate kalpui a ni dawn a ni.

Khawpui mamawhna leh sorkar laipui duhdan mila CPD siam a nih theih nan sorkar laipui chuan consultancy firm, Credit Rating Information Services of India Limited (CRISIL) Risk & Infrastructure Solutions a chhawr a. Vawiin meeting-ah hian CRISIL aiawh te hian tun dinhmuna Aizawl than dan leh dinhmun tlangpuite tarlangin chak zawka hmasawnna kawng a zawh zel dan tur rawtna te an siam a. Chu chu ngaihtuahho leh sawiho niin member-te hian Aizawl tihhmasawnna tur rawtna an neih te an chhawpchhuak a, heng rawtna hrang hrang te hi CPD ah hian a tul dan a zira lakluh tur a ni.

Meeting hi UD&PA Secretary Pu R.Lalvena IAS chuan a kaihruai a, UD&PA Joint Director H. Lalengmawia’n City Development Plan leh JNNURM chungchang sawi hawnna a nei a ni.