Nimin leh vawiin ruahsur leh thli tleh chuan Aizawl khawpui leh Mizoram hmun hrang hrangah harsatna thlenin - in chhia, kawngpui min, leimin in kawngpui a hnawhte leh luilian in chenna hmunhma a chim mek te a awm nual a ni.

Aizawl khawpui chhung bikah chuan - Nursery Vengah Mimal chenna in chu thli leh ruahin tukin tukthuan eihun lai khan a ti chhia a. He inchhia hi he thu buatsaih lai hian YMA , khawtlang mitlawmngaite leh SDRF member ten an senghawi mek a ni. Hunthar Vengchhunga Lei tlahniam lai pawh a chhak atanga leimin leh chirhdiak in a hnawh khat vek a vawiin chawhnu lam thleng pawh khan sawrkar hmalakna in thenfai hna thawh a ni naa kawngpui erawh a la tlang thei lo a ni. Chanmari West leh Vaivakawn inkar kawngchhak lam insakna bulhnai atanga lungtum tla chuan private car, ecosports a delh chhia a; helai kawngpui dunga chengte hi tunah hian fimkhur thu hlaah an riak chhuak a; kawngpui hi Vaikvakawn Hunthar peng atang leh Chanmari lam atangin dan pin a la ni rih a ni. Lung tlakna lai bawrah hian vengchhung YMA hotute an duty mek bawk a ni. Chhinga Vengah retaining wall chim in kawng a hnawh a thenfai hna thawh nghal a ni a. Chanmari Ramhlun Road-ah lung lian tak tak Laipuitlang pang atanga tla a awm bawk a; he thu buatsaih lai thleng hian kawngpui a la dangchat a ni. Dinthar Vengchhungah EBCC Biakin sak thiahna thlang kopang chu min thei dinhmunah a ding a; New Secretariat Complex  Taxation Commissioner kawmthlang chu a thlang kawngpui, New Secretariat atanga Dinthar panna kawngpui hnawhpin theihin min hlauhthawn awm in a awm bawk a ni. Heng bakah hian Aizawl hmun tam takah leimin in foothpath a tihchhiat te, thingzar tliakin electrict hrui a vuak chhiat te leh mimal in hmun a tih min te a awm nia hriat a ni.

Thli leh ruah avanga Aizawl hmun hrang hranga leimin, mimal leh vantlang thil tihchhiat te hi Aizawl Bawrhsap chuan a hnuaia officer te tir chhuakin a enfiah tir tawh a; sawrkarin a tul in hna a thawk chho mek zel a;  fimkhur thu hlaah khawlaia chhuak tam loh a him zawk nia ngaih a ni.

DM&R atanga thu dawn danin Tlabung khua a in 100 vel chu tuiin a chim mek a, Langkaih lui lian avangin Bawrai khua pawh an in singsa mek a, Tlawng lui lian avangin Sairang khuaa in 14 a chim mek bawk a, hengte avang hian chhungkaw engemaw zat hmun him lamah an in thiar chhuak mek bawk a ni.