Vawiin chawhma dar 11 khan Food & Drugs Administration, Directorate of Health Services huaihawtin Aizawl khawpui huam chhunga Damdawi zuartute tana buatsaih Training chu Synod Conference Hall-ah neih a ni a. Dr. K.Ropari, Principal Director, Health & Family Welfare Department chu khuallian niin a hmanpui.
He Training of Drugs Dealers hi Pu Lalsawma Pachuau, Joint Director (Food & Drugs) in kaihruaiin.Mizoram Chemist & Druggist Association President Pu Vanhmingthanga'n thu tawi sawina hun a hmang bawk.
Dr.K.Ropari Principal Director chuan training chhimtu kalkhawmte lawmna leh fuihna thu a sawi a. Damdawi zuartute pawimawhzia leh mite tanpuitu an nihna te tarlangin Damdawi Licence chu licence dang ang a nih loh thu te, thihna leh nunna hial an kuta a awm avanga a zuartute pawh an fimkhur a ngaihzia te a sawi a. Damdawi zuartute hi Sawrkar nena tangho tur kan nih avangin mi diklo leh fello te kutah kan license hlu tak hi kan hawh tir tur a ni lo va. Dan phal loh thil, tawlh ruk leh lo khawih hi danin a khap tlat avangin hemi kawngah hian kan fihlim tur a ni a. Hetiang tih chingte lakah hian kan fihlim tur a ni bawk" tiin kalkhawm te a chah a ni.
Technical Session-ah hian Pu F.Lalliantluanga, DD (F&D) chuan Damdawi Dawr enkawl dan Powerpoint Presentaion a entir a, Pu Lalsandama, DD (F&D) hnen atangin Schedule H1 Drugs chungchang ngaihthlak ni lehin Pu Lalhmingliana, AD (F&D) hnen atangin Damdawi khuahkhirhna dan leh a hremna chungchang ngaihthlak a ni bawk.
He Training-ah hian Aizawl Khawpui huamchhung atangin Damdawi zuartu mi 700 bawr vel lai an kalkhawm a ni.
