Aizawl khawpui chhunga veng hrang hranga motor intawhkhawmna thler siamthat leh cheimawi hna thawh dan tur enho hna chu UD&PA leh PHE changtu Minister Pu Zodintluanga hovin tukin khan PWD, P&E, PHE, UD&PA leh Aizawl Municipal Corporation hotuten an chhunzawm.

Pu Zodintluanga hovin tukin zing karah khan Dawrpui Jail Veng, Hospital Road atanga Babutlang panchhohna peng an tlawh a. Aizawl khawpui laili lai tak, motor leh mihring vei vak tamna he kawngpui hi rawt hniama, Millenium Centre chuan hnuai pan pheina kawngpui nen hrut rual dan a awm thei angem tih a hmunah an en a. Kum tam tak kaltaa helai hmuna transformer bun tawh pawh a dahna a hluiin a derthawn tawh avang leh khawpui thang zelah kawngpui zauh nana hmun remchang tak a nih avangin Aizawl Municipal Council chuan dah sawn dan a ngaihtuah mek bawk a ni. Minister leh official kalkhawmte chuan he kawngpui hi 3D image hmanga a lan dan tur design hrang hrang chi thum siam ni se tiin, mipui tana awlsam zawkna tur leh traffic tawt lutuk tihziaawm nana tha ber nia ngaiha chu thlan chhuah leh nise an ti a ni.

Republic Veng kawng pengthuam, Pi Pangi peng tia hriat lar tlawh lehin hetah hian AH&Vety changtu Minister Pu C.Ngunlianchunga leh Aizawl South I bialtu MLA Pu R.Vanlalvena bakah khawtlang hruaitu engemawzat an tel a. He kawng pengthuam pawimawh tak, Raj Bhavan kawmthlang lam nena inri, Aizawl veng hrang hrang kal pawhna kawng peng hi tun aia awlsam zawka motor inher theihna tura tih zauh dan ngaihtuah a ni a. Waiting shed leh BSNL khawl pahnih awm mek sawn dan tur te, department hrang hrangte kutthlakna tui pipe, electric ban, telephone ban leh hrui leh thil dangte sawn dan tur leh helaia vantlang ram leh mimal ram neitute nena inbiak rem dan tur te sawiho a ni bawk.

Minister Pu Zodintluanga chuan Aizawl khawpui cheimawi leh a mi chengte tana kawng tinrenga awlsamna siamsak turin sawrkar chuan hma a la mek a ni, a ti a. Khawpui tawt leh traffic jam nasa tihziaawm nan khawpui chhung inkalpawhna kawngpui siamthat hna thawh mek niin a theih ang anga zauh belh dan kawng dap mek a nih dan sawiin mipui tawiawmna a ngen nghal bawk a ni.

Minister ho hian official te hian Circuit House hlui thiah mek an tlawh bawk a. Circuit House building thiah tak hmunah hian Convention Centre sak tum a ni a. He Convention Centre hi Central sawrkar mi lian, sawrkarin security a pek theih sang ber Z+ security dawng pha chin, Prime Minister leh President te thlenga nuamsa taka an thlen theihna tur leh hmun dang pan ngai lova meeting lian tham neih theihna tur hmunpui siam tum a ni a. Khualtha thlenna tur pindan engemawzat bakah Conference Room pahnih, Multipurpose Hall pakhat, mi 600 lenna Auditorium pakhat, restaurant/dining hall chantlung tak bakah car 95 leh 2 wheeler 115 hun theihna tur parking lot chhawng thum siam tum a ni.

Inspection neihnaah hian AMC Mayor Pu PC Lianghmingthanga, Addl. Chief Secretary Pu Arvind Ray, UD&PA Secretary leh PWD Engineer-in-Chief, bakah UD&PA, PHE, P&E leh AMC hotute an tel a ni.