Lirthei tam lutuk avanga Aizawl khawpui traffic tawt lutuk tiziaawm tura hmalakna thar, Parking House Support Scheme (PAHOSS) chu vawiin khan Chief Minister Pu Zoramthanga chuan Chief Minister’s Conference Hall-ah sawrkar officer pawimawh thenkhatte leh thutharlakhawmtute hmaah a tlangzarh. Traffic jam harsatna lian awmlohna state ah he scheme hmang hian Mizoram hi kan la siam theih ngei a beiseiawm a ni,  Chief Minister chuan a ti.

Chief Minister chuan PAHOSS kalpui dan tur tlangpui a sawi a. Aizawl khawpuia traffic jam a nasat em em chhan bulpui ber mai chu motor park na hmun tha a tlem em avang leh motor kawngpuia motor kan park mai thin avang ni berin, mipuiin kan mamawh em em chu motor parkna hmun tha a ni, a ti a. Aizawl khawpui traffic tawt avanga mipuiin harsatna kan tawk thin chu  sawrkarin a ngaipawimawhin, tiziaawm turin Parking House Support Scheme (PAHOSS) chu rang taka duan a nih thu a sawi. Chief Minister chuan PAHOSS hnuaiah hian mimal emaw, pawl angin emaw, motor park theihna hmun siam thei (a tlem berah LMV panga tal park theihna) hnenah Sorkarin tanpuina, motor pakhat zel parkna hmun ruahman turin Rs 1,00,000/- tanpuina pek a nih tur thu a sawi.

PAHOSS kalpui tur hian a tirah Chief Minister kaihhruaina hnuaiah ‘House Parking Committee’ din a ni a, ngun taka ngaihtuahna hman a nih hnuah scheme hi duanchhuah ta niin, he Scheme hi chak taka kalpui a nih theihna turin Chief Secretary kaihhruaina hnuaiah Executive Committee pawh din a ni a. UD&PA chu Nodal Agency a ni.

Kumin 2018-19 chhung hian he scheme hnuaiah hian motor (LMV) sangkhat (1000) park theihna tur ruahmanna turin he financial year kal lai mek (2018-19) chhung a hman turin Rs 10 crore dah fel nghal a ni. Kum lo awm tur 2019-20 financial year-ah chuan Rs 100 crore dah tum a ni ang. PAHOSS hnuaia hmalak duh, hmunhma nei tha te tana a dil theih nghal turin PAHOSS scheme guidelines fel tak duan nghal a ni a. UD&PA Department lamah application form mumal tak lak nghal mai theih a ni ang. A Scheme kalpui dan tur kimchang tarlanna guidelines pawh UD&PA website-ah a duh apiang tana download theih turin tun kar chhunga upload tum a ni ang. He scheme hian motor park-na tur insak thar mai bakah, kawngpui dunga in nei, Parking atana insak tawhsa parking a let duh tan dil theih a ni anga. Aizawl khawpui chhunga traffic jam nasat zualna-ah priority pek a ni ang. A tul angin priority area siam thin a ni ang.

Vawiin PAHOSS tlangzarhna hunah hian Aizawl Mayor Pu P.C. Lalhmingthanga pawhin thu sawiin, Chief Minister hmalakna hnuaia traffic jam harsatna thui taka sutkianna tur rang taka duan a ni chu lawmawm a tih thu leh, mipui tiphur thei zawnga kalpui a nih ngei a beisei thu a sawi a. IGP Pu LH Shanliana leh Dr. Vanlalramsanga, Planning Secretary te pawhin thu sawiin, he scheme hi Mizoram leh a bik takin Aizawl khawpuia chengte mamawh a nih avangin a lo hlawhtlin theih nan inhawng leh thurual taka sawrkar leh mipui an thawhho pawimawh an tih thu a sawi.