Vawiin khan Sericulture Minister Dr.K.Beichhua chuan Basic Seed Farm, Rangvamual; Sericulture Complex, Zemabawk leh Sericulture Emporium, Chaltlang te a tlawh. Sericulture Minister hi Secretary, Pu Vanlalduhsaka'n leh Sericulture Department Director, Pu Rozama leh thawktu dangte'n an tawiawm a ni.
      
Minister Dr.K.Beichhua chuan Basic Seed Farm, Rangvamual Office-ah thu sawiin, Pathianin zofate chenna tur ram tha tak min pek chu a hausakna tam tak hi haichhuah a la ni lo, a ti a. Ram dinhmun sik leh sa inthlak ngaihtuahin, ram leilung hausakna tha hnem ngai taka haichhuah hi Sericulture Department tum a ni, tiin a sawi a. Chak zawka hmalak a nih theih nan State Budget-ah Sericulture Department mamawh thun luh a nih theih nan hmalak a ni ang a, hmalakna a chak theihnan mipui leh Department-a thawkte an pawimawh a ni, a ti bawk.

Minister chuan Sericulture Complex Conference Hall-ah thu sawiin Department-a hnathawkte inpekna chu ropui, a ti a. Sericulture Department chu intodelhna tha, hmasawnna ngelnghet neih theihna tur anih avangin, thahnem ngai taka thawk zel turin a fuih a ni.

Basic Seed Farm, Rangvamual-ah hian Pure Line (chi fir) khawi reng a ni a, Sericulture Department hnuaia Mulberry Seed Farm 10 leh Private Seed Rearer 15 te khawi tur, Kum khatah vawi 6 an thar chhuak thin a. Departmental Seed Farm leh Private Seed Rearer te khawi atang hian Farmer te khawi tur (commercial seed) siamchhuah leh thin a ni. He lai hmunah hian Murberry kung 8 hectares a zauah chin a ni, silk pangang khawi tan atanga thla 6 hmalamah prunning tih thin a ni.

Sericulture Complex, Zemabawk  hi In-service leh Farmer te training na hmun a ni a. Training hi kum tin vawi 4 neih thin niin, training hostel leh residential training anga kalpui thin a ni. Pangang chi, Farmer te khawi tur siamna hmun a awm a, a chi keu thei turin dah vawhna-ah pangang tui te hi vawn that a ni. Heng bakah hian Reeling Factory (a hlum) awmin, Demonstration Farm pawh a awm bawk a ni.

Tun dinhmunah hian pangang chingtu mi 5700 vel an awm a, silk hi Rs 7000/kg rate a hralh a ni tlangpui. Silk thar chhuahte hi West Bengal, Uttar Pradesh-ah te hralh thin a ni.

Sericulture Emporium-ah hian silk atanga siamchhuah shawl, muffler, puan chi hrang hrangte zawrh a ni.