Vawiin khan PHE Department Conference Hall ah Swachh Shakti 2019, Kurukshethra, Haryana a tel tur mi 18 thlahna hun hman a ni.

Ministry of Drinking Water and Sanitation , Government of India chuan faina leh thianghlimna lama hmeichhe thawh hlawk tak takte pualin intawhkhawmna hun , Swachh Shakti 2019 a buatsaih a. Ni 11 & 12 February, 2019 ah Kurukshetra, Haryana a hman tur niin, March ni 8 a "International Women's Day (Hmeichhiate Ni)" lo thleng tur behchhana hmeichhiate tan bika buatsaih a ni. He hun puiah hian Prime Minister Pu Narendra Modi chu khuallian a ni dawn a. State hrang hranga thingtlang khua atangin hmeichhia, faina leh thianghlimna lama grass root level a thawh hlawk tak tak,   khawtlang hruaitu, Swachhagrahi (village level sanitation workers), angwanwadi hnathawk, self help group member, ASHA worker  leh a dangte te tel tura buatsaih a ni. Mizoram atangin hmeichhe VCP, Swachhagrahi leh anganwadi hnathawk, an khua theuha faina kawnga hmalatu mi 18 chu he hun pawimawh tak hmang tur hian thlan an ni a. Heng mite hi Aizawl , Kolasib leh Champhai district mite atanga thlante an ni a, Aizawl District Swachh Bharat Mission - Gramin (SBM-G) Co-ordinator Lalchhuanglianan a hruai dawn a ni.

PHE Department enkawl SBM-G hnuaiah hian Swachhagrahi/ village level sanitation worker te hi khaw tinah pakhat tal awm tura tih a ni a . Mizoramah hian Swachhagrahi 763 an awm mek a, khaw pakhata mi pakhat aia tam awmna te pawh a awm a ni. Swachhagrahi atan hian tupawh, he hna thawk tur atana mahni duhthlanna ngeia inpe, a khaw mi leh sa, engang hnathawk pawh a nih theih a. Village Water and Sanitation (WATSAN) Committee te chuan heng mi inpe te hi Swachhagrahi atan an ruat thin a.Thianghlimna kawnga khawtlang dinhmun hrang hrang endik te, khaw chhunga chhungkua zawng zawngten ek in an neih dan dinhmun endik te, bawlhhlawh sakhat leh tui ril sawngbawl dan dik a khaw mipuite kawhhmuhte leh thianghlimna kawng hrang hranga mipuite zirtir leh kaihhruai hi Swachhagrahi mawhphurhna a ni. Mizoram hi March 2018 khan pawn lera inthiar awm tawh lohna - Open Defecation Free (ODF) a ni tawh a, ODF nihna tluantling nei tur hian khaw tina Swachhagrahite hi an pawimawh em em a ni.