Vawiin khan South Tuipui Assembly Constituency bialtu MLA leh Health & Family Welfare Department, Higher & Technical Education Department leh Commerce & Industries Department changtu Minister ni bawk Dr R. Lalthangliana chuan a bial chhunga Hnathial, Tarpho, Khawhri leh Thingsai khua te tlawhin hmasawnna hnathawh tul hrang hrang a hmunah a enfiah a, sawrkar official-te leh khawtlang hruaitute hmalak dan tur a sawipui.

A khaw tlawh ah te Minister hi khawtlang mipui thahnem takin lo hmuakin Tarpho Playground, Khawhri Community Hall-ah te mipui nena inkawmhona hun tha tak hman a ni a. Dr R Lalthangliana chuan mipui kalkhawmte chungah lawmthu sawiin Pathian leh mipuite duhsakna zarah South Tuipui biala thlan tlina a awm leh Minister dinhmun pawimawh tak luah theia a awm chu lawmawm a tih thu a sawi a. Mipuiten a hnena mamawh anlo thlen hrang hrang - link road siam, inkalpawhna tha siam, inbiakpawhna tha siam, Health Sub Center tih changtlun, zirna tih hmasawn, tui supply tha, hriselna lama hmalakna te leh hmasawnna hna dang te mumal taka tih hlawhtlin thuai a nih tur thu a sawi a. Ram ti hmasawn zel turin mipuiten chanvo leh mawhphurna pawimawh tak an nei a ni tiin Socio Economic Development Policy (SEDP) kaltlangin mipuite mahni kutkawih ngeia an din chhuah theihna tur leh hemi kaltlanga eizawnna ngelnghet an neih theihna turin hmalak a ni dawn a ni, a ti a. Hlawhtling tur chuan rinawmna, taimakna leh tih tak taka beihna a pawimawh a ni tiin SEDP hnuaiah pawisa faia sem ngawt ni lovin hnathawh tak takna atan tanpuina kan kalpui dawn a ni, a ti bawk. Hnahthial District tih puitling thuai a nih tur thu pawh sawiin hemi hian Hnahthial leh a chhehvel khua ah te hmasawnna tam tak a thlen dawn a ni tiin mipui kalkhawmte chu inpawhtlang taka hmalak puiah a sawm a.

Minister hi Pu J. Hmingthanmawia, Director Commerce & Industries, Dr F. Lallianhlira, Principal Director H&FW, Pu R. Lalrintluanga, CE (Road) PWD, Dr H. Lalchungnunga, Director, DHS, Dr T.Lalhmangaihi, Director, DHME leh Pu HD Lalrintluanga, Joint Director Commerce & Industries te bakah Lunglei District official te, khawtlang hruaitute leh party hruaituten an tawiawm a ni.