UD&PA, Sports etc Minister Pu Zodintluanga chuan India rama a vawikhatna atan Aizawl khawpui hmun hrang hrangah bawlhhlawh khawlai a paih ten pawisa chawi zel tawh tura ruahmanna siam anih thu a sawi a. He thu hi National Service Scheme (NSS) Foundation Day Vawi 49-na lawmna programme-a a sawi a ni a. NSS Foundation Day lawmna  hi tukin zing dar 8 khan AR Ground-ah neih a ni. 

Khuallian Pu Zodintluanga chuan NSS hnuaia thalai zirlaite hnathawh chu chhuanawm a tih thu a sawi a. Mizoram hi state fai ber ni turin hmalak mek a ni tiin hemi kawngah hian NSS-te an pawimawh hle a ni, a ti a. Mi harsa leh damlo ten an hman tangkai theih nan thisen NSS-in an pe thin chu lawmawm a tih thu a tarlang a. Littering fine kalpuina turah pawh hian NSS-in an thawhhlawk hle dawn a ni, a ti a. Kalkhawm zirlaite chu tifaitu piah lamah tibaltu nilo turin a chah a. Minister chuan an hnathawhna leh hmalakna hrang hrang tha taka chhunzawm zel turin NSS chu duhsakna a hlan nghal bawk a ni. 

Foundation Day pual hian Aizawl khawpui-a kawngpui pawimawh hmun nga (5) NSS volunteer-te hian an tihfai hnuin AR Ground-ah an kalkhawm a, chungte chu- Chanmari atanga AR Ground (Zarkawt kaltlangin), Chanmari atanga AR Ground ( Electric Veng kaltlangin), Sikulpuikawn atanga AR Ground, Vaivakawn atanga AR Ground leh  College Veng Field atanga AR Ground-te an ni a. Hei bakah hian AR Ground leh a chhehvel an tifai nghal a ni. 

National Service Scheme (NSS) hi September Ni 24, 1969 khan din tan niin kumtin NSS day lawmna neih thin a ni a. Tun dinhmunah hian India ram pumah NSS Volunteer nuai 40 vel an awm mek a. Mizoram-ah chuan kum 1972 khan Pachhunga University College (PUC)-ah din a ni a. Kum 1996 atang khan Higher Secondary School-ah din tan a ni bawk. Tun dinhmunah hian Mizoram pumah College 26 leh Higher Secondary School 54-ah NSS hi an awm mek a ni. 

NSS hmalakna hrang hrang zingah faina chungchang inzirtirna leh public hmun thenfai hi an ngai pawimawh hle a. Nikum chhung khan Cleanliness Drive vawi 190 vel neih niin kumin hian vawi 100 vel Cleanliness Drive hi an lo kalpui tawh bawk a ni. 

Sports & Youth Services Secretary Pu H.L Rochungnunga chuan programme hi a kaihruai a. State NSS Officer leh Deputy Secretary NSS cell ni bawk Dr. Zirlianngura chuan NSS hnathawhna leh hmalakna chungchang report kimchang takin a pe a. Prof P. Rinawma, Coordinator NSS Cell, MZU chuan lawmthu sawina in hun a khar a. School, College leh University zirlai NSS Volunteer bakah NSS Programme Officer-te an tel kim hle a ni.

Attachment

  • Loading attachment...