4427/2025-2026

AIZAWL; 12^th February, 2026: Vawiin khan  Directorate of Census Operations, Mizoram bul tumin  Aizawl DC Pisapui Hall-ah  ni thum awh training buatsaih a ni a. He training hawnna inkhawm hi Er.Lalhriatpuia, District bawrhsap leh Principal Census Officer (PCO), Aizawl District chuan kaihhruaiin, Directorate of Census Operation hnuaia mithiam (Resources persons):Pu Shivam Gupta leh Pi Melody Lalnunsangi ten training hi an pe a ni.  Vawiin training-ah hian Aizawl Municipal Corporation (AMC) leh Serchhip District  huam chhunga chhiarpui neihtu tur District leh Charge level Officer leh Official te hnenah Chhiarpui neih dan tur zirtir an ni.

Chhiarpui training hawnna thuchah sawiin, Er.Lalhriatpuia chuan khawvela sawrkar hnathawk ten beihpui an thlakna lian ber chu kan Lok Sabha Election leh kan Chhiarpui (Decennial Census/ National Census) hi a ni a. National Census hi kum 10 dana neih thin niin, kum 2011 kha Covid hripui leng avangin kan nei thei lova, kuminah hian neih a ni dawn ta a ni. Chhiarpui hi data lakkhawmna (Statistical Exercise)  satlia a ni ringawt  lova, Kan social leh economic dinhmun  hriatna, englam hawi zawngin nge hmasawnna rahbi  tuk tur tih te, rualkhai zawk leh tha zawka chhawmdawlna scheme hrang hrang duan leh kalpui dan tur te hriatna hnar pawimawh ber a ni a.   Census data dik hi Planning, good governance leh development innghahna lungphum a nih avangin, dik lo leh rin tlak lo a awm a thiang lo. Census data dik  leh rintlak hi official te rinawmna, taimakna leh thiamnaah innghat a nih avangin, vawiin training hi bel tak thiam tum theuh u la, kan district  tan Census data rin tlak  leh dik paw chhuaktu ni turin ka ngen che u a, duhsakna ka hlan a che u, a ti.

Mizoram tan Census 2027 hi Phase hnih-a kalpui a ni dawn a, a phase-I na  hi house listing and housing Census (HLO) niin, a phase-II na hi Population enumeration (PE) a ni ang. A Phase-I na-ah hian In dinhmun leh a chhunga awm thil (Housing Condition, amenities, assets and Facilities)  data lak khawm a ni ang a. A phase-II na-ah hian mimal chanchin leh economic dinhmun (Individual level demographic, social and economic) data lak a ni thung ang.  A phase-I na hi 16th April,2026-15^th May,2026 ah house to house field work neih a ni ang a. Self- Enumeration hi 1^st April,2026—15^th April,2026 chhungin neih tur a ni. India ram chhiarpui hmasa ber hi kum 1872 a neih niin, tuna census 2027 hi India Independent hnua chhiarpui  vawi 8-na tur leh India  independent hma nen chuan a  vawi 16-na a ni.