1534/2026-2027

Aizawl, 28th July, 2026: Vawiin khan Aizawla Assembly Secretariat Annexe Conference Hall-ah Aizawl Municipal Corporation (AMC) hnuaia Registered Engineer-te tana buatsaih ni hnih chhung awh tur (28th leh 29th July, 2026) "Training on Safe Building Construction Practices" chu hawnna hun neih a ni a. He hun hi Aizawl Mayor Pu H. Lalremtluanga chuan khuallian niin a hmanpui. He training hi Mizoram sawrkara Disaster Management & Rehabilitation (DM&R) Department te, Aizawl Municipal Corporation leh National Institute Technology (NIT), Mizoram te ṭangkawpin an buatsaih a ni.

Khuallian chuan thu sawiin Mizoram chu Seismic zone V-a awm a nih thu leh engtik hunah pawh lirnghing na takin min nuai thei reng a, inbuatsaihna ṭha neih angai tih a sawi a; Engineer ten Building sak phalna dilsak mai bakah, ban phun hnuah pawh site plan leh building permit milin an sak leh sak loh enpui zui zel turin engineer-te a chah a ni. Tuichhe paih chungchangah fimkhur tur leh tuihawk luankawrte pawh Building permission a kan dilpui angin an siam tak tak em tih en zui a, kaihruaitu kan nih a ngai a ti bawk a ni. 

Khuallian chuan chhiatna chu kan dang thei lova, a tawrhna erawh chu kan tiziaawm thei a ni tiin, vawiin a lo kal te an mawhphurhna a sangin, building saknaah himna (safety) an ngaihpawimawh a ṭul thu a sawi bawk a ni.

Training chhung hian Aizawla in sakte a lo him zawk dan tur te, Aizawl Municipal Corporation hnuaia Building regulations te, Side Development and Slope Modification regulation te leh building chak lo thawm ṭhat dan tur te inzirtirna hun neih tur a ni a; Disaster Management & Rehabilitation Department te, Aizawl Municipal Corporation te, National Institute of Technology Mizoram te, Civil Engineering Department Mizoram University te leh Mizoram Public Works Department aṭanga mithiam ten zirtirna an pe dawn a ni.

He hun hi DM&R Director Pu Chuauhnuna chuan a kaihruai a, DM&R Dy. Director Dr. Lalrokima Chenkual hnen aṭangin Engineer-te pawimawhna leh he training-a an zirtur tlangpui presentation hmanga thusawi ngaihthlak a ni a, DM&R Joint Director Pi Lalnunmawii chuan lawmthu sawiin he hun hi a khar a ni.

He training-ah hian Aizawl Municipal Corporation hnuaia Structural Engineer te, Engineer dang te, Architect te, Supervisor te leh Firm hrang hrang aiawh te an tel a ni.