No.132/2021-2022

Aizawl, 14th April, 2021 : Vawiin khan Aizawl Mayor Pu Lalrinenga Sailo hovin a pisa ah Aizawl Municipal Council Area a vawk pul hri avanga thite phumna tur ngaihtuah a ni.

Mizorama vawk pul hri leng mek (African Swine Fever) vangin Aizawl khawpui chhunga veng pahnih Edenthar leh Armed Vengah vawk emgemawzat a boral tawh a, heng veng pahnih hi 'infected area' ah puan an ni tawh a, hetih rual hian Aizawl khawpui huamchhungah vawk pul hri a rawn leng nasa a nih a, buaina lian zawk a lo thlen loh nan vawk pul hri avanga vawk thite phumna tur hmun ngaihtuah a ngaih vangin vawiin thutkhawm hi koh a ni.

Vawiina AMC Mayor hova AMC hotute leh AH & Vety. department hotute thukhawm chuan vawk pul hri avanga vawk thite phumna tur atan Tuirial, Luangmual leh Hualngohmuna AMC ram neihte chu an ruahman a ni a, a rang thei ang berin AMC hotute leh Vety. department hotuten a hmun hi an enho ang.

Vawiin thutkhawmah hian Edentharah vawk 73, Armed Vengah vawk 42 an thi tawh tih report a ni.