2808/2025-2026 

AIZAWL; the 7^th January, 2026: Vawiin khan DC Pisapui Hall-ah, District Election Officer, Aizawl District Er.Lalhriatpuia, IAS chuan Aizawl Municipal Corporation General Election, 2026 a hman tur Final Electoral Rolls a tlangzarh. He Final Electoral Rolls hi  State Election Commission, Mizoram thuchhuak angin  qualifying date  atan 01.01.2026 hmanga Electoral Rolls Summary Revision, 2026 neih a buatsaih a ni. AMC General Election neih hun tur chu State Election Commission, Mizoram in hriattirna a la rawn tichhuak leh ang.

Aizawl Municipal Corporation Draft Electoral Rolls buatsaihna  kalpui dan chu he tiang hi a ni:

Aizawl Municipal Corporation Draft Electoral Rolls chu ni 24.09.2025 khan mipui te en theih turin tarchhuah a lo ni tawh a. Ni 25.09.2025 atanga ni 25.10.2025 thleng AMC Electoral Roll atanga paih, thun thar, siamthat ngai leh insawn duh te tan dilna (claims and objections) chu Local Level Officer (LLO) te hnenah thehluhna hun hawn a ni.

Ni 25.09.2025 – ni 25.10.2025 chhunga dilna lut chu ni 26.10.2025 – ni 25.11.2025 chhungin Municipal Electoral Registration Officer (MERO)/Asst. Municipal Electoral Registration Officer (AMERO) ten an endik a. Hetiang an enfiah zawh hnu hian MERO-ten thutlukna an siam fel hnuah hming thunluh ngai, paih ngai leh siamthat ngaite chu thliar hran leh a ni a, hemi hnu hian Data entry (Computer-a thunluh hna) thawh zui nghal char char a ni. AMC Final Electoral Roll hi vawiin January 7, 2026 hian peih fel a tar chhuah/tlngazarh a lo ni ta a ni.

Tun tum AMC Final Electoral Rolls a voter awm zat chu hmeichhia – 129656, leh Mipa – 110333 an ni a, an vaiin voters hi ni 239989 an awm a, Mipa ai hmeichhia an tamna chu 19323 a ni.  Voter  tamna ber Ward hi WARD XVIII niin, voter  18906 an awm a. A tlemna ber Ward hi WARD VIII niin; voters  7975 an awm thung. Voters pun( Increase) tamna ber ward hi WARD  XI niin; voters  804 in an pung a, voters kiam( decrease) tamna ber Ward hi WARD XIV niin; voters 210 in an kiam thung a ni.

Final  Electoral Rolls tlangzarhtu District Election Officer Er.Lalhriatpuia chuan Summary Revision of AMC Electoral Rolls, 2026  chu bialtu MERO te, AMERO te, LLO te, Local Council, Political Parties, Tlawmgai Pawl hrang hrangte leh Media te tawiawmna leh finchhuahna avanga tluang tak leh hlawhtling taka neih theih a nih thu tarlangin, an hnenah lawmthu a sawi bawk.  a. DEO chuan AMC Electoral Roll hi MLA Roll nen a hranpa a buatsaih a ni a, hemi a inthun thar, insawn (transfer) leh siamthat (correct) te hi MLA Roll atan a rin nghal theih a ni lo, a ti.