2809/2025-2026

Dated Aizawl: the 07 January 2026 : Vawiin khan India rama naupang chawimawina sang ber Pradhan Mantri Rashtriya Bal Puraskar 2025 dawngtu Esther Hnamte chu Social Welfare, Women & Child Development Department Minister, Pi Lalrinpuii hovin I&PR Auditorium ah a Award dawn den chhena lawmpuina hun hman a ni.

He hunah hian khuallian Social Welfare, Women&Child Development Department Minister Pi Lalrinpuii chuan thusawiin, Mizo naupang taima, tumruh leh chhuanawm Esther Lalduhawmi Hnamte Award dawn lawmpuina hun an hmang thei chu lawmawm a tih thu a sawi a. Mizorama Hmeichhia leh naupangte dinhmun chawi kannaa hma latu Department an nih angin Women&Child Development chu Department pawimawh tak a nihdan te sawiin, Esther Hnamtein he award a dawn theihna tura hma nasa taka latu North-east Zone Cultural Centre leh Art&Culture Department-te hmalakna pawh chhuawnawm a tih thu a sawi a. Esther Hnamte chu Mizoram, India pumpui leh khawvel hmaa Mizote hmel tilangtu a ni tih tarlangin, hma hun eng tak nena kal zel turin duhsakna a hlan nghal bawk a ni.

Pradhan Mantri Rashtriya Bal Puraskar hi Ministry of Women & Child Development hnuaiah heng category pasarih (7) - Bravery, Art & Culture, Environment, Innovation, Science & Technology, Social Service leh Sports lama naupang titha bikte hnenah hlan thin a ni a. Esther Hnamte hian he chawimawinahi Art & Culture hnuaiah India President Droupadi Murmu hnen atangin December ni 26, 2025 khan a lo dawng a ni.

 Vawiina Esther Hnamte Award dawn lawmpuina puaal hunah hian Social Welfare,  Women&Child Development Department hotute leh thawktute thahnem tak bakah  Chairman leh Secretary, State Council for Child Welfare leh mi pawimawh dangte  an tel a. Hun hman hi Pi Lalzarmawii, Commissioner&Secretary, SW-WCD  Department chuan kaihruaiin Esther Hnamte chu lawmpuina pangpar a hlan nghal  a. Pi ZoramthangiChhangte Director, WCD chuan lawmpuina thilpek a hlan nghal  a. Esther Hnamte chhungte hnen atangin thusawi ngaihthlak niin, Pi Zonunthari  Joint Secretary, SW, WCD Department chuan lawmthu sawiin hun hi a khar a ni.