No.1648/2021-2022  

Aizawl, 31^st July, 2021 : Vawiina Health Minister Dr. R. Lalthangliana hova Mizorama COVID-19 hripui leng mek dinhmun thlira thukhawm chuan Aizawl Municipal Corporation (AMC) huam chhunga Total Lockdown kalpui mek chu kar khat dang (August ni 7, 2021 zanlai dar 12 thleng) pawhsei an rel a, hemi hun chhunga inkaihhruaina dan leh AMC area pawn lama kalpui dan tur chu State Executive Committee on State Disaster Management Authority in an ruahman ang a, Chief Minister-in a pawmpui chuan hman a ni ang.

Vawiina thukhawm chuan Mizoram dinhmun leh a bik takin Aizawl dinhmun an thlirin hri leng inkaichhawnna in a vawr tawp a thlen mek laia inthlahdul chu a rem rih loah an ngai a, hetih rual hian sample test runpui neih mek pawh ngawrh taka kalpui chhunzawm tha an ti a ni. Meeting-ah hian sawrkar laipui lama H&FW Ministry hotute chuan sample test zat atanga hri inkaichhawnna (positivity rate) 10 % (za ah sawm) aia sang a nihna district ah chuan khauh taka inkaihhruaina kalpui tur a ni tih an sawi thu tarlan a ni bawk a ni.

Mizoram Police Aizawl khawpui huam chhunga duty te chu ramri lamah thawn thlak deuh vek an nih avangin Total Lockdown kalpui chhunzawm chhung hian LLTF te leh YMA te chu theihtawp chhuaha ngawrh taka duty chhunzawm tura ngen an ni a, kan zavaia kan him tlanna tura ruahman a nih vangin mipuite chu karkhat dang lo insangmar leh hram hram tura ngenin, COVID Appropriate Behaviour zawm chunga sawrkar ruahmanna te tha taka thlawp turin an ngen bawk a ni.

Dr. R. Lalthangliana chuan ICMR hotute hnenah RTPCR test kit leh a bawlhlote Mizoram tana rawn pe leh tura a ngen thu sawiin, ICMR lam chuan RTPCR Test kit 20000 bakah a bawlhlo Viral transport Medium (VTM) leh rna Extraction Kit 20000 ve ve, a vaiin cheng vaibelchhe 5 man hu vel chu a thlawna an rawn pek tur thu hrilhin karleh hian a rawn thlen hman beisei a ni, a ti.

Rapid Antigen Test kit chungchangah thlaphanna tur a awm loh thu meetingah hian sawi niin, nuai 1 lo thleng tur a awm bakah nuai 2 dang pawh order fel tawh a nih thu meetingah hian tarlan a ni a, RAgT kit man a tlakhniam zel avangin RAgT hmanga sample test man pawh Rs. 100/- ah tihhniam a nih tur thu sawi a ni.

Meetingah hian July ni 26, 2021 tlai lama Vairengte daia Assam police in an kah hliam Vairengte tlangval kum 20 mi dinhmun tarlan a ni a, kah hliam a nih veleh hian rang takin Vairengte PHC ah hruai nghal a ni a, a hliam a lo nasat deuh vangin Kolasib District Hospital-ah hruai nghal a ni a, July ni 26, 2021 zan la la hian Kolasib District Hospital-ah zai nghal a ni a, silaimu hi a malpui dinglamah lutin a malpui vei lamah a tlang a, silaimu hi a tang nghe nghe a ni. A malpui ding lamah hian thisen zam pawimawh (femoral artery) kahchhiat a ni a, hei hi siam that a ni. Kah hliam a nih hian thisen a hloh hnem avangin thisen unit 8 lai pek a ni. A hliam hi enkawl zui ngai nia hriat a nih vangin Civil Hospital, Aizawl-ah July ni 27, 2021 khan lak chhoh a ni a, Dr, ZR Thiamsanga, Vice Chairman, Health & Family Welfare Board hovin senior daktawr te an inrawnkhawm a, phai lam Centre lian a Vascular Surgeon 3 lai rawn bawkin uluk takin enkawl dan tur an sawi ho a ni.

Nimin July ni 30, 2021 khan Team of Surgeon daktawr 3 dinin anni hian a malpui dinglam chu zai hawng lehin silaimu in a tihchhiat femoral artery hnawhtu thiisen khang hlawm chu an la chhhuak a, damdawi hmanga an thuahfai hnuah uluk takin an khawih leh a ni. Hetia an khawih hnu hian a hmaa thisen khangin a hnawh vanga a malpuia marphu awm tawh lo kha tha takin a awm leh ta a, damlo pawh hi a thatchhuah leh thuai an beisei a ni. A malpui vei lama silaimu tang pawh hi lakchhuah nghal a ni.

 SAD Conference Hall, MINECO-a meetingah hian MOT Chairman Dr. ZR Thiamsanga, MLA,  AMC Mayor Pu Lalrinenga Sailo, Chief Secretary Pu Lalnunmawia Chuaungo, Addl. Chief Secretary Pu JC Ramthanga bakah COVID-19 dona kawnga hmalatu department hrang hrang hotute,  Indian Medical Association, Medical Operational Team, Jt. NGO Coordination Committee  leh Mizoram Kohhran Hruaitute Committee (MKHC), Local Task Force aiawhte an tel a ni.