3156/2023-2024

Aizawl, 21st December, 2023: Aizawl Municipal Corporation (AMC) chuan October ni 1-8, 2023 chhung khan Faina Hapta 2023 (Cleanliness Week 2023) hmangin, vawiin December ni 21, 2023 chawhnu dar 1:00 khan AMC Auditorium-ah Faina Hapta 2023 kharna leh lawmman semna hun hman a ni. He hun hi Aizawl Mayor Pu Lalrinenga Sailo chuan khuallian niin a hmanpui a, faina kawnga hma la thate hnenah chawimawina a hlan a ni.

Faina Hapta -2023 kharna inkhawmah hian Aizawl Mayor Pu Lalrinenga Sailo chuan thu sawiin, faina beihpui chu khar a nih loh thu leh faina hapta bik erawh khar a nih thu a sawi a. Hmun fai chu hmun nuam a nih thu leh State pawn atanga mikhual lo kal ten Aizawl fai an tih zia an hrilh ṭhin tih a sawi a. Thingtlang lamin faina lamah hma an sawn nasat thu sawiin, Aizawl pawhin faina kawnga tan a lak lehzual a tul thu leh hmun dang tih dan tha entawna hmasawn zel turin Local Council kalkhawmte a chah a ni.

Aizawl Mayor chuan Property Tax chu AMC sum hmuhna pawimawh a nih thu sawiin, 15th Finance Commission atanga sum hmuh a tlem tial tial avangin chhiah khawn a ngai a, chhiah khawn dan hi langtlang a ni tur a ni, a ti a. Kum 2022 chhunga AMC in Property Tax atanga sum a hmuh chu cheng nuai 324 a ni a, kumin 2023 chhungin cheng nuai 573 ah a kai chho a. Hetianga Property Tax punna chhan ber chu veng hlut dan danglam ta leh mipui hmaizahna avanga rei tak a zat dik loa kalpui tawh chu siamṭhat a nih tak vang a ni, a ti. Mayor chuan AMC in online a property tax pekna a siamthar thu leh mi tam zawk erawh chuan Local Council kaltlanga an la pek zel dawn avangin tlawmngaih chhuaha property tax khawn chhunzawm zel turin Local Council kalkhawmte a chah a ni.

Mayor chuan inhmun laih, phal lohna hmuna bawlhhlawh leh leivung paih chungchangah Local Council ten thuneihna tam zawk an neih theihna turin hmalak chhoh zel a nih thute, veng thenkhat street light nei lote chu AMC-ah report pe zel turte, AMC leh Local Council te'n thawhhona tha an neih zel theih nana rawtna thlen zel turtein a chah bawk a ni.

Faina Hapta - 2023 denchhena AMC hmalakna tamtak zingah Local Council 85 atanga veng fai thlan chhuahte, bawlhhlawh thliar hrang tha veng thlanchhuahte, faina leh thianghlimna kawnga hma la tha mimal chawimawi te, vantlang inthiarna tihchangtlunte leh hman khat daih plastic (Single Use Plastic) khap chungchanga hmalaknate a tel a ni.

Faina Hapta 2023 chhunga endiknaah Aizawl veng fai berah Republic Vengthlang thlan a ni a, pahnihnaah Laipuitlang thlan niin, pathumna lawmman hi Thakthing vengin an la a ni. Lawmman dawngtute hian chawimawina thuziak bakah pakhatnain sumfai Rs 50,000/-, pahnihnain Rs 30,000/- leh pathumnain Rs. 20,000/- an dawng a. Heng bakah hian veng 5 hnenah consolation prize sumfai Rs.5,000/- theuh pek a ni.

Bawlhhlawh thliar hrang tha Local Council pathum (3) College Veng, Chawnpui leh Bethlehem Vengthlang te chu sumfai Rs 5,000/- theuh hlan an ni a. Kumin Faina Hapta pual hian faina leh thianghlimna kawnga hma la tha mimal 23 hnenah chawimawina thuziak leh tangkafai Rs. 2,000/- pek niin, Sr. Sanitation Office hnuaia khawlai hmun phiat (street sweepers) hnathawk tha thlanchhuah Pi Malsawmkimi leh Pu B. Lalrinkunga te hnenah chawimawina thuziak leh sumfai Rs 10,000/- pek a ni bawk.

Faina Hapta 2023 kharna inkhawm hi Er. Lalhriatpuia, MCS, Municipal Commissioner-in a kaihruai a. Pu Laltlanzova Khiangte, Executive Corporator (i/c Sanitation) in inlawmna thu a sawi a. Pu Lalremruata Kullai, MCS, Joint Municipal Commissioner chuan kalkhawmte hnenah lawmthu sawiin Cleanliness Week 2023 Closing Function tihtawp a ni.

Faina Hapta 2023 kharnaah hian veng hrang hrang aiawh Local Council-te leh faina kawnga hnathawk ṭhate an tel a ni.