Vawiin khan Aizawl Municipal Council chu anmahni Session Hall, Thuampuiah thukhawmin Aizawl Municipal Council Building Regulations, 2011 an ngaihtuah hova, lungrual takin an passed.
He Building Regulations, 2011 ngaihtuaha passed a nih na chhan chu Aizawl Development Authority, Building Regulations, 2008 kha kumin September ni 19 khan AMC kutah sorkarin a lo hlan fel tawh a. He dan hi AMC pian hma a lo awm tawh a nih avangin dan leh hraiin a phut anga AMC Building Regulations, 2011 chu duan niin vawiin hian Session-ah put luh a ngaihtuahho a ni ta a ni.
He Regulations chhawp chhuah chungchangah hian Session kaihruaitu Chairman Pu CT Zakhuma chuan member te remtihna la in CEO leh mipawimawh dangte Aizawl Municipal Council Building Regulations, 2011 duanchhin a hrilhfiah tir a ni. Darkar 4 chuang zet member ten an sawi ho hnuin AMC Building Regulations, 2011 chu siamthat ngai lai te an siam that hnuah lungrual tak a passed a ni ta a ni. Insak phalna Building permission hi October ni 24, Thawhtanni atang hian Aizawl Municipal Council Office, Thuampuiah a dil theih tawh dawn a. Hun khaihlak chhunga phalna la lova in lo sa te pawhin phalna la tha leh vek turin AMC chuan a hriattir.
