Vawiin chawhnu dar 2.00 khan Aizawl DC office huaihawtin Aizawl District Disaster Management Authority (ADDMA)chuan Dawrpui M/S ah Aizawl New Market himna tur chungchanga inrawnkhawmna hun a buatsaih a. Hetah hian ADDMA kaihhnawih Department hrang hrang officer-te leh Dawrpui Local Council te, Dawrpui Branch YMA te leh CYMA aiawhte an tel a; New Market chhunga sumdawng association 15 aiawhte nen chhiatrupna lo thleng thei – lirnghing leh kangmei laka sahimna tur leh inven dan tur chungchang inpawh taka sawiho a ni.

Aizawl District Disaster Management Authority chuan 21.2.2012 khan meeting neiin, Aizawl New Market-a kangmei chhuak thei laka inven dan tur leh ruahmanna uluk zawk siam dan tur chungchang a lo rel tawh a; he meeting-a thurel bawhzui tura inrawnkhawmna ni atan vawiin chawhnu dar 2:00 hi a lo ruahman lawk tawh a. Chumi chhung chuan 25.2.2012 (Inrinni) zing khawvar hmain New Market-ah hian kangmei a chhuak ta a ni. He thil thleng hi ADDMA chuan pawi a tih thu inkhawm kaihruaitu Pu Rothuama SDO(Sadar) chuan a sawi a. Hun lokal lehzel turah chhiatrupna laka inveng thei tura ruahmanna siam leh inring reng a awm a tulzia sumdawngte hnenah hian New Market thlalak nena kawhhmuha inzirtir a ni a. New Market chhunga sumdawngte atangin ni tina an khawsak dan te, electric hrui an zam dan te ngaihthlak a ni a; rawtna an siamte pawh chhinchhiah a ni bawk.

ADDMA chuan New Market chhunga bawlhhlawh paihna mumal zawk siam leh a hmun siam belh te, electric wiring mumal tak siam te, kangmei phuh-hlumna (fire extinguisher) te chhawp turin Trade & Commerce Department hnenah ngenna a lo siam tawh a ni.