Pu Lal Thanzara, Parliamentary Secretary chuan vawiin khan Kolasib District High School Sports 2012, Diakkawn Playground, Kolasib-ah a hawng.

Flag pawtpharh a Sports a hawn zawhah thu sawiin Pu Lal Thanzara chuan, Sports a tel hi Discipline zirna tha ber a ni, a ti. Mi hlawhtling ni tur chuan kawng hrang hrangah insum theihna leh mahni inthununna kan neih a ngai a. Cancer vei tamna ram kan lo nita mai hi a pawiin Kristianna nen a inhmeh lova. Vawiina zirlaite hian ngaihtuahna thar kan hman a, tuna tanga zuk leh hmuama insumna nen bul kan tan thar chuan dinhmun tha ah kan chuang chhuak leh thei dawn a ni, a ti a. Pu Lal Thanzara chuan, zirlaite chu rilru thianghlim taka inelna nei tura chahin Class chhung zirlai bak Extra Curricular activity ngai pawimawh deuh deuh turin a fuih a, nakin hnua anmahni nun kaihruaitu tur leh Leadership la neihtirtu tur a ni, a ti.

Tunlaiin India ramah ei leh ina insum loh avang leh taksa control loh avangin tleirawl zingah natna Juvenile Diabetis vei an awm ta nual a. Hei hi insumna leh mahni inthununna atanga inven theih a ni tih kan hriat a ngai a ni, a ti a ni. Sports Discipline hrang hranga inel turte chu theihtawp chhuaha bei tur leh an lo chak lo a nih pawhin tlak dan thiam turin Pu Lal Thanzara chuan a chah a ni.

Kolasib District High School Sports 2012 hawnna hi Pu G.S.Zaithantluanga, Chairman Organising Committee & Heahmaster, Govt. Diakkawn High School chuan a kaihruai a. Pu Jerry Zoremsanga, Secretary, Organising Committee chuan report pein Sport neih chhung hian Field pathum Saidan Sports Complex, Venglai leh Diakkawn field-ah leh Indoor Stadium –ah te inelna neih thin a ni dawn tih a sawi a ni.

District Sports ah hian Kolasib leh District chhung khaw hrang hrang atangin School 17 an tel a. Discipline 20-ah inelna neih a ni dawn a ni.