Vawiin khan Mizoram Journalist Associatioon President Pu C Lalrambuatsaiha chanchinbu The Aizawl Post kum 10 tlin champhaphak chu Finance Minister Pu H Liansailova hovin Pi Zaii Hall, Synod Conference Centre-ah lawm a ni.
Khuallian Finance Minister chuan Aizawl Post Editor leh Publisher Pu C Lalrambuatsaiha te chhungkua leh he chanchinbu a lo thawk tawh thin te leh thawk mek te thinlung taka a lawmpui thu sawiin kum 10 lek chhunga chanchinbu chhiarhlawh ber pawl dintu te chhungkaw thawhrimna leh inpekna chu midang te tana entawntlak leh zirtlak a ni, a ti. Ding chhuak tura chakna nei lova inngai, anmahni khaichhuak tura sorkar hmalakna reng reng a thawha thawh chhin hmaa thil tihtheihloh leh hlawhchhampui tura inngai nghal ringawt Mizo mipui zingah tam tak an awm tih sawiin Pu H Liansailova chuan hetiang rilru paih hi a hun ta hle a ni, a ti a. Taima taka bei tlat te chuan midangte hlawhchhamna hmunah pawh an hlawhtling thin tiin chutiang mi tumruh te tan chuan harsatna hi anmahni tibeidawngtu ni lovin chona thar siam sak tu a ni zawk thin, a ti bawk. Minister chuan chanchinbu leh electronic media te hi mipui te thu thar hriatna beng an nih avangin journalist ten thudik leh belhchian dawl an tihchhuah a tul a, mipui te ngaihnawm tih zawng leh hralh a tlak theihna tur ringawt ai chuan a quality ngaipawimawh hmasa tura chahin hmasawn zel tura tan an lakna kawngah chanchinbu miten tha an thlah tur a ni lo, a ti a. A tha zawnga mipui thinlung kaihruaitu ah tang fo tur leh hriatna tha chawlut tu, mipui hmasawnna rawngbawltu ni zel turin chanchinbumite a fuih a ni.
October 30, 2002 a din, The Aizawl Post Editor leh Publisher Pu C Lalrambuatsaiha’n Aizawl Post chanchinbu tihchhuah tan a nih dan a bul thum atanga sawiin vawiin a kum 10 tlin champhaphak lawmna ah mithiam sawmbik te paper buatsaih leh sawihona hun an hman atang te a Mizoram tana thil tha an ngaihtuah chhuah ngei a beisei thu a sawi a ni.
Aizawl Post Tin Jubilee lawmna inkhawm hi Aizawl Post Sports ziaktu Pu Bonny Lalrindika’n a kaihruai a. Chawhnu lamah seminar neih niin Bihar sorkara Principal Secretary Pu Liankunga IAS chuan “Good Governance with special reference to Bihar” tih thupui hmanga paper a buatsaih leh North East Consultancy Services Ltd. neitu Pu Robert Romawia Royte buatsaih “An alternative funding in addition to State Annual Plan” tih te chu ngaihthlaka, sawihona hun hman a ni bawk.
