4839/2024-2025

Dated Aizawl: the 26th March 2025 :Smart City project Common Bio-Medical Waste Treatment Plant, April 1, 2025 atanga a taka hman tawh tur denchhenin, vawiin khan Aizawl Smart City Ltd leh Mizoram Pollution Control Board-te chuan hemi kaihhnawiha inzirtirna hun ‘Training cum Awareness on Common Bio-Medical Waste’ hun an huaihawt a. He hun hi Pu H. Lalengmawia, Commissioner & Secretary, H&FW Dept. (Chairman, State Advisory Committee ni bawk) chuan  khuallian niin a hmanpui a ni.

He hunah hian Khuallian Pu H. Lalengmawia chuan thusawiin, Mizoram sorkar leh Aizawl Smart City zarah kan ramin a mamawh em em damdawiin bawlhhlawh bik sawngbawlna hmun kan nei thei ta chu a lawmawmin a ropui a tih thu a sawi a. Damdawiin bawlhhlawh sawngbawlna hmun tha tak kan neih rualin a nih tur anga kan hman zawh loh a hlauhawm thu sawiin, hmang tangkai turten rinawm tak leh taima taka kan tih tur kan tih a tul ve dawn thute a tarlang a. Damdawiin, clinic etc ah te chuan a paihna tur bik rawng nei (color coded) an sem vek dawn thu leh in register tawhte chu Code pek an ni dan turte leh chung  atang chuan  dan zawm tha leh tha lote pawh a langsar hle dawn tih a sawi a. Hremna pawh  Dan hmangin licence hial inchhuhsak theih a  ni tih sawiin, chung ang chu a thlen kher lohna turin bawlhhlawh te uluk taka thliar a paih turin kalkhawmte chu a ngen nghal a ni.

Vawiin program ah hian Pu CC Lalchhuangkima, Chief Executive Officer,Aizawl Smart City chu Chairman niin damdawiin bawlhhlawh sawngbawl dan turte  dan leh hrai lam atanga inzirtirna hun Pi C. Lalmuanpuii, Environmental Engineer, Mizoram Pollution Control Board in a  hmang a. Hemi zawhah hian Treatment Plant operate leh enkawl tu tur Pu Mahavir Suthar, BL Engineering chuan Bio-medical Waste facility enkawl dan tur presentation a pe a. Pu Lalmuankima, Senior Accounts Officer, Smart City in Treatment Plant hman man rate te hrilhfiahna hun hmang leh bawkin, Zawhna leh chhanna hun hman nghal a ni a. Pu V.Lalruatliana, Deputy CEO, Smart City chuan lawmthu sawiin training/awareness program hi a khar a ni.