4838/2024-2025

Lunglei, 2025 Vau thla ni 26: Vawiin khan Agriculture Conference Hall, Lungleiah Mizoram Bana Kaih (Handholding) Scheme hnuaia thlai thar hralh tur chhek khawlna, secondary collection centre (SCC) enkawltute tan Lunglei District Agricultural Marketing Committee (DAMC) huaihawtin 'Training on Operational Manual of Secondary Collection Centre' buatsaih a ni.

Training hi Lunglei DAMC Member Secretary, District Agriculture Officer Pu VL Hmangaihchhunga'n a kaihruai a. Mizoram Agricultural Marketing Board (MAMB) Co-opted Member Pu Lalnunpuia chu resource person a ni.

He training-ah hian Lunglei District chhunga secondary collection centre-a Co-ordinator, Manager leh Accountant te bakah, secondary collection centre cluster society hruaitute, mi 34 an tel a. Society-te inkhaidiat dan leh mawhphurhna hrang hrang te, thlai thar hralh (marketing) kalpui dan tur te inzirtir niin, primary collection centre (PCC) te chu target group an nih angin sawhthing hralh chhuah turte chu thianghlim leh uluk taka sawngbawl a, secondary collection centre (SCC)-ah phurh luh ṭhin tur a nih thu leh secondary collection centre-a lut leh chhuak chauhin price support an dawn theih thu te inhrilhfiah a ni a. Manager leh Accountant te chu a taka entirna nen account vawn dan zirtir an ni bawk.