Vawiin khan Mission Veng DYO Hall-ah Aizawl South II biala Industries sector hnuaia NLUP dawngtu chhungkaw 359 hnenah NLUP 2nd installment Rs. 1,89,94,800 sem a ni, chawhrualin chhungkaw khatin Rs. 52,910 dawng ang an ni.
He hun hi Bialtu MLA Lt. Col. Z.S. Zuala chuan hmanpuiin Sorkarin NLUP hmanga mipuite thleng phak tanpuina a sem hi a lawmawm hle a, ka bial chhungah hetianga sum tam tham tak mi harsa zawk te lei rem rahna tur sorkarin a rawn sem hi kan tan chuan vawiin ni hi ni chhinchhiah tlak tak a ni a, lawm nachang i hria ang u a ti.
He hun hi Pu J. Hmingthanmawia, Addl DC Aizawl chuan kaihruaiin Pu R. Selthuama, MLA, Chairman NLUP Implementing Board pawhin a hmanpui a. Pu R. Selthuama chuan NLUP dawngtute chuan lawmna chang hria sela, lawmthu sawi rawh se. Lawmthu sawina tha ber chu sorkarin a pek ang ngeia tihhlawhtlin a ni. Kan kristianna hi NLUP ah hian lo parchhuak mawlh rawh se a ti.
Pu John Saikhuma, General Manager, DIC Aizawl chuan technical report pe in heng pawise an sem chhuah te hi uluk taka endik zui zel an tum thu a sawi. Dr. Rober Rualthankhuma, Project Co-ordinator, NLUP Implementing Board chuan lawmthu sawi pahin NLUP atana sorkarin sum a ruahman dan te a sawifiah nghal a, NLUP Implementing Board chuan 1st Phase a chhungkaw 45,139 a tanpui mekte bakah 2nd Phase leh 3rd Phase a chhungkaw tanpui tur 74,861 te tanpuina turin ruahmanna chak takin a kalpui leh mek thu a sawi.
Hetih lai hian Industries Sector hnuaia Puanthui (tailoring) thlangtute dawn tur puanthui khawl tha chi leh a cheimawina tur khawl eng emawzat chu Industries Department chuan a chah thleng tawh a, sem mai turin ruahmanna a kalpui mek bawk a ni.
