2991/2022-2023
Aizawl, the 8th December 2022 : Vawiin khan Aizawl South III Bialtu MLA Prof.F.Lalnunmawia chuan a bial chhung khaw pathum - Chawilung, Chamring leh Lungsei a Health Clinic Centre thar a hawng.

Heng khaw pathuma Health Clinic Centre hawnnah Prof. F. Lalnunmawia chuan Chawilung, Chamring leh  Lungsei ten Health Clinic Centre  thar an nei chu lawmawm a tih thu sawiin khaw pathum atana hetiang mipui mamawh ngaihtuahsaktu Chief Minister Pu Zoramthanga leh Health Minister Dr. R.Lalthangliana te  hnenah lawmthu ka sawi takzet a ni, a ti. Bialtu MLA chuan heng HCC a thawktu turte chu SEDP sum hmanga rawih an ni dawn tiin a sawi a. Tunah hian VC te ruahmannain a building pawh kan luah hawh a ni a, nakinah a building leh mamawh dang pawh kan la ngaihtuah chho zel ang a. Khawtlang mipui te pawn tangkai taka in hman ka duh a. Tul leh mamawh te pawh ka hnenah pawh thlen inthlahrung lo turin ka chah che u a ni, a ti bawk.