2992/2022-2023
Aizawl, the 8th December 2022 : Vawiin khan Sialsukah Assembly Speaker Pu Lalrinliana Sailo chuan Mizo Zirlai Pawl buatsaiha ‘Zofest’ neih mek chu khuallian niin a hmanpui a. Zofest Souvenir ‘Lailun’ chu a tlangzar nghal bawk a ni.

Pu Lalrinliana Sailo chuan Mizo Zirlai Pawl ten Zofate hnam inpumkhatna atan Zofest an buatsaih thin chu lawmawm a tih thu a sawi a. ‘Mizo’ thumal leh ‘Mizoram’ te chu rorelna inlumletin a rawn hrinchhuah a ni, a ti a. Kan chenna a hran avanga mite’n min hriat dan leh koh dan te dang mah se, unau vek kan ni tih hre reng turin kalkhawmte chu a chah a ni.

Inlakhranna leh tawng hrang hman avanga inthliarna te a tlem zel theih nan a zirlai hruaitute hmalakna chu fakawm a tih thu a sawiin thangtharte rilru, hmathlir leh suangtuahna te chuan thliarkar rilru paih a, hnam inpumkhatna kawngah pawh pawimawhna thuk tak a nei a ni, a ti a. Kan unaute chhawmdawlna leh ramri buaina ah te sawrkar, kohhran leh tlawmngai pawl te thawhhona chu lawmawm a tih thu Speaker hian a sawi bawk. Social media kan hman danah fimkhur a ngaih thu sawiin Speaker chuan Social Media hmansual chu hripui leh natna khirh tak ang mai a rilru (moral) ti chhe tu a ni, a ti .Speaker chuan kan unaute tawrhna chu kan tawrhna a ni tiin, kan hnam inpumkhatna atan midangte thatna lai inhriat sak zel turin kalkhawmte chu a chah a ni.

Mizo Zirlai Pawl buatsaih ‘Zofest’ hi kum 2002 atangin neih tan a ni a. Khawvel hmun hrang hrang a cheng Zofate inpumkhatna atan neih thin a ni.