Mizoram sorkar chuan sum felfai zawk leh hman dan siamthatna tur Mizoram Public Resource Management Program (MPRMP) atan hian Asian Development Bank atangin US Dollar maktaduai 100 lai pukin hma a la tan mek a. Sorkar sum hman dik leh fimkhur zawk nan hmalakna tam tak zinga pakhat Treasury zawng zawngah Computer hmanga Cheque System-a kalpui a tum a. He Computerization leh Cheque System hmasa ber chu Aizawl South Treasury-ah vawiin khan Parliamentary Secretary (Finance) Pu K.S. Thanga chuan hawngin SAD Cashier hnenah Cheque pekchhuah hmasa ber a hlan a ni.
Finance Secretary Pu Lalthansanga kaihhruai Treasury Computerization hawnna inkhawmah hian Pu K.S. Thanga chuan Mizoram chu state lian lo tak leh mahni intodelh lo tak ni tih hriain sorkar chuan sum leh pai hman dan thar (fiscal reforms) leh sum tam zawk dehchhuah (revenue) te chu ngai pawimawhin MPRMP a kalpui a ni, a ti a. MPRMP hnuaia hmalakna pakhat Treasury Computerisation leh Cheque System hawn theih a ni ta chu lawmthu sawiin hei hian dik leh felfai zawk, hun khawhral tlem zawk leh Bill dik lo laka fihlimin sorkar sum chevel leh enkawl a nih a beisei thu a sawi. Heng bakah hian sorkar leiba rulh kawngah (Debt Management) te, Hriselna leh Zirna tihhmasawnna lamah te, Public Sector Enterprise siamthat lamah te pawh sorkarin hma a la mek a. Mizoram sorkar chuan revenue tih punna turin tui, ram, motor leh kawng chhiah a pun a, zirna lamah pawh School Education hnuaiah ADB puihna-in VRS changtlung tak kalpui a nih mek thu a sawi a ni.
Finance Secretary Pu Lalthansanga chuan mihring thluak pangngai hmanga Treasury-a sum pek chhuah hna hi a hautakin tihsual palh awlsam tak a nih thu te, Computer software a bika duan hmanga kalpui a nih chuan felfai zawk leh hun a lak tlem zawk a beisei thu te sawiin hemi atan hian kum 2008 lam daih tawh atang khan ngaihtuahna an lo sen thu leh a sum sen tur hautak tak ngaihtuahin hun an lo hman tawh dan te a tarlang a. Hei hi Mizoram tan chuan hmasawnna tling nia a hriat thu a sawi.
Hawnna inkhawm-ah hian Pu F. Vanlalruata, Addl. Secretary, Finance Department (FMU)-in Technical Report a pe a. Treasury Computerization leh Cheque Payment System kalpui a nih dan tur a lem nena entirna power-point presentation chu Pu V.L. Thlanawma, Treasury Officer, Aizawl South Treasury-in a nei a ni.
