658/2025-2026
Dated Aizawl, the 30th May, 2025: Vawiin khan Pu Rex Zarzoliana Vanchhawng, Superintendent of Police, Aizawl, chuan SP Conference Hall, Treasury Square-ah Prohibition of e-Cigarettes Act (PECA), 2019 kengkawh tura ruat, police officer-te zirtirna hun chu khuallian niin a hmanpui a. He hun hi World No Tobacco Day 2025 denchhena National Health Mission (NHM) hnuaia State Tobacco Control Cell, National Tobacco Control Programme (NTCP) buatsaih a ni.
Khuallian, Aizawl SP, Pu Rex Zarzoliana Vanchhawng chuan he hunah hian thu sawiin, police leh NHM-te thawhhona chu lawmawm a tih thu a sawi a. e-ciggarette hman chungchanga inhrilhhriatna neih a pawimawhzia leh tunlai rawltharte zingah an intihhmuh nasa tih tarlangin, ruihhlo tihtanna kailawn a nih avangin kan thalaite him zawkna atan tun atanga a do zawnga hma lak a tul thu kalkhawmte hnenah hian a chah a ni.
Pu Zoramthara, Addl. SP (C), Overall incharge under Aizawl District (PECA) pawhin e-cigarette leh vape-te chu tunlaiah inlakchangkanna atan leh zialzuk sim tiawlsam thei anga dik lo taka a hluar chu pawi a tih thu a sawi a. Heti ang thilten a nghawng ber, rawltharte zinga inhrilhhriatna neih chu a tul takzet tih a sawi a ni.
Naktuk, May ni 31, 2025 (Inrinni) hi World No Tobacco Day niin, kumin atana thupui chu ‘Unmasking the Appeal: Exposing Industry Tactics on Tobacco and Nicotine Products’ tih a ni a. Kumin thupuiin a tum ber chu sumdawnna atana vaihlo hmangtute hmanraw hrang hrang mipuite hnena pholan leh hriselna lama mipuiten hma an sawnna tura hrilhhriat a ni.
PECA 2019 chungchang police officer-te hnena zirtirna hun hi Dr. H. Lianthangpuia, State Nodal Officer, NTCP, NHM chuan kaihruaiin, World No Tobacco Day chungchang a sawizau a. Pi Vanlalzari, State Legal Consultant, NTCP, NHM, chuan PECA 2019 chungchang zirtirna hun a hmang a. Pu R. Lalremruata, State Consultant, NTCP, NHM chuan lawmthu sawiin hun a khar a ni.
