1804/2022-2023
Aizawl 2nd September 2022: Aizawl Sustainable Urban Transport Project (ASUTP) a tana hmalakna kal mekah Asian Development Bank hotute ni 28th Aug.22 khan an lo kal a, tun kar chhung Aizawl ah an awm a, Mission Inception Meeting neih a ni. ADB hotu lo kal te hi Kaushal Kumar Sahu, Sr Project Officer (Mission Leader) leh Alok Bharadwaj Staff Consultant (Mission Member) te an ni.

Pu Lalmalsawma Pachuau, Secretary UD&PA Deptt. leh ASUTP Project Director kaihhruai a ni 29.08.22 a UD&PA Deptt meeting room ah neihah ASUTP kal pui tawh chin dan hrang hrang, Aizawl khawpui a lirthei leh mipui chet vel dan zir mek te thlir a ni a, project thawhthei tur enchianna (Feasibility study) neih dan tur te sawiho bak ah Detailed Project Report(DPR) siam dan thlengin sawiho a ni. Tin Stakeholder Department hrang hrang PWD, Traffic Police, Transport Deptt., AMC leh Aizawl Smart City Limited hotute pawh ADB hotute hian an kawm bawk a ni. Stakeholders’ Meeting ah hian Department hrang hrang te hmachhawp leh tuna ASUTP hnuai a hnathawh tur te inhriat pawh leh thawhho(Integrate) a ngaih thu sawi a ni.

ADB hotu Aizawl tlawh a lo zin te hi UD&PA Deptt in lo mikhual in Aizawl khawpui traffic jam dan leh khawpui kawngpui leh mipui chet vel dan hrang hrang lo enpui an ni a. Khawpui laili Sikulpuikawn atanga Bawngkawn thleng lirthei tawt dan te, Aizawl a lirthei lut leh chhuak te, mipui chet vel awlsamna turin khawpui chhung a lift leh Escalator dah te, Ropeway siam theih a nih leh nih loh dante enchian pui niin nithum(3) chhung zet Aizawl leh a chheh vel fan pui an ni.

Tun ah hian ADB kalphung angin Project Readiness Financing (PRF) ang a hna tan phawt a ni a, he mi ang hian Aizawl khawpui a mipui chet velna leh lirthei chet dan zirchiang turin Project Planning Design Monitoring Consultant (PPDMC) atan Mott Macdonald, Noida thlan tawh an ni a, zirchhianna an nei tan mek a ni. Consultant Mott Macdonald hian thla 31 zirchianna an neih turah hian City Mobility Plan, Feasibility Study leh Detailed Project Report (DPR) siam te a tel a ni. Chumi zirchianna leh ruahmanna (Feasibility Study leh Detailed Project Report etc.) te chu Asian Development Bank in fund theiha a ngaih chuan Aizawl Urban Transport atan hian sum thahnem tak hmuh theih beisei a ni.