Vawin chawhma dar 11:30 khan Mizoram District 8 a Helicopter Service hawnna atan a Service hmasa ber Aizawl to Lunglei chuan Chief Minister Lal Thanhawla, Home Minister Pu R. Lalzirliana leh Pi Lal Riliani Chief Minister nupui te phurin Lunglei Kawmzawl Helipad ah hlawhtling takin a rawn tum a ni. He Helicopter Service Inaugural Programme hi Kawmzawl Assam Rifles hmun ah Lunglei Bawrhsap Pu V.Sapchhunga kaihhruaina a neih a ni. HPC Vice Chairman leh Parliamentary Secretary Pu S.Laldingliana te pawh in he hun hi an hmanpui a ni.

Chief Minister chuan thil thalo leh chin thalo siam that ngai tamtak a awm a, heng siam tha tur hian mi zawng zawng a bo a bang awmlo in kan pawimawh a ni a ti. Rinawmna leh taimakna chu ram siamthat nan hmanraw awmchhun anih bak ah, Sorkarin mi harsa te leirem rah lehna atana a kalpui mek NLUP hlawhtlinna atan pawh a thil pawimawh ber a ni a ti. Kan ram natna Corruption ah hian eirukna bak ah duhamna, pamhamna, zawmthawtna leh a thalo hlir thil tamtak a awm a, heng te hi khua a tlai hma a kan sim hman loh chuan hnam angin kan la ding zo lo thuai mai ang tih a hlauhawm hle a ni a ti. Thawk tha silo leh mahni hna pawh a tuilo hlawh tamtak beisei si te hi kan chin tha lo sim a ngai takmeuh a ni a ti a, Sawrkar in ram hmasawnna tur tamtak a kalpui mek a hmachhawp tamtak a nei bawk a; heng te hlawhtlinpui tur chuan kan zavai a kan tanrual a ngaih thu a sawi a. Mizoram in kum 1 chhung intuam hlawm nan Rs 4500 - 5000 Vbc a mamawh laiin Rs 300 vbc pawh a thawk chhuak thei meuhlo hi chu tan lak a ngai tak meuh a, Mizoram leilung leh ram hmul hausakna la chhuak tur chuan taimak leh rinawmna bawk a ngai a, thawkrim te tan hlawhchham a awm lo a ni a ti. Sorkar hmachhawp leh hmalak na lian tak tak kalpui mek Sairang thleng tur relkawng, Kaladan Multi Modal Transport Project hmang a Lawngtlai thleng tur rel kawng leh kawlphetha siam chhuahna tur Project te hi a hlawhtling har dawn lova. He mi atan hian ram leilung fate kan in puahchah fel a ngaihthu a sawi a, Mizoram a Natural Gas leh tuialhthei awm te pawh lak chhuah tum in Company pali (4) ten chak takin hma an la mek a ni a ti. Ramchhung kawng chhe siam nan Central sawrkar in Mizoram tan Rs 200 vbc a ruahman fel tawh thu sawiin Department hrang hrang te pawh project siam na atan DPR siam hmanhmawh leh file kal chaktir kawng ah tan an lak nasat a ngai a ni a ti a, Falkawn Referral Hospital a Civil Hospital sawn leh Medical College siam tumna pawh Union Health Minister Pu Ghulam Nabi Azad sawipuiin a puitlin thuai tur thu a sawi bawk ani. Chief Minister chuan Helicopter Service hi rikrum leh hmanhmawh thil ah a tangkai tur thu a sawi a, tun aia changtlung zawk a kalpui zel tum a ni a ti.

Vawiin Helicopter Service Inaugural programme ah hian pawl hrang hrang aiawh ten lawmthu sawina an nei a. Parliamentary Secretary pawh in he service hlutna leh tangkaina tur te sawiin Airport Mizoram chhim lam a siamna tur Sawrkarin hmun remchang a zawn reng thu a sawi bawk a ni. Helicopter chuang duh te chuan Bawrhsap Pisa ah ngaihven thin tur a nih thu leh Lunglei to Aizawl chuan man Rs 1500/- a nih thu official te chuan an tarlang a ni.