Vawiin chawhnu dar 1:00Pm khan PHE Minister Pu S.Hiato, chuan Saiha District, DC’s Conference Hall, Saiha-ah Mizoram sawrkar hnuaia Head of Office te meeting a neih pui.

He meeting-ah hian Minister chuan Saiha District chhunga sawrkar hmalakna hrang hrang leh hmachhawp te a sawiin, Saiha District-a Polytechnic leh Nursing school din tur te,District Civil Hospital , DC’s Office leh Circuit House sak that tur thu te, Tourist Lodge district chhung khaw tamtaka sak tur thu te leh Saiha Greater Water Supply te chu a langsar zualte an ni.

Pu S.Hiato chuan State intodelh leh mahni kut-ke a ding thei ni tur chuan Centrally Sponsored Scheme (CSS) hrang hrang leh NLUP te kan hman dik hmasak phawt a ngai thu a sawi a. Officer kalkhawm te chu Mipui te zirtirtu leh kawng kawhmutu pawimawh ber an nih ti hre reng turin a chah.

Head of Office kalkhawm te chuan an hmalak tawhna leh an hmachhawp hrang hrangte tarlangin, harsatna hrang hrang an tawh te pawh Minister hnenah an thlen nghal. Minister chuan an harsatna te chu Aizawl lama hotute hnenah a thlen tur thu a sawi bawk.

Minister chuan Mizoram sawrkar hnuaia officer kalkhawm te chu MADC hotute leh officer te nen thawhhona tha tak an neih chu chhunzawm zel turin a chah hlawm.

Vawiin meeting-ah hian Minister hi Mara Autonomous District Council (MADC) atangin CEM, Pu RT Zachono leh a thawhpui thahnem takin an tawiawm bawk.