Mizorama helicopter service tur chu vawiin chawhma khan Thuampui helipad-ah a hawnna inkhawm tawite buatsaihah Chief Minister Pu Lal Thanhawla chuan a hawng ta.

Chief Minister chuan Mizoram chu ram kilkhawra awm, hmasawnna ruhrel tha neilo leh inkalpawh tawnna tha pawh duhthusamlo anih avangin helicopter service hi tul tak a ni a ti a. Mi pawimawh te chauh nilo, mi nawlpuite tan leh tanpui ngaiha rang zawka intanpui zung zung nan a tul hle a ni a ti. Mizoram helicopter service thei tur a ni ta hi a lawmawm takzet a ni a ti.

Sipai enkawlna hnuaia Helipad te hi kum 1990 chhoa sipai hotu GOC-in-C, Eastern Command ina hman phalna Mizoram sorkar alo pek tawh chu tun thlengin ala ding reng a ni a ti.

Chief Minister chuan a thlawhna leh a michuangate himna chu an duh ber anih thu a sawi a. Mizoram mipui tan him tak leh hlawhtling taka service turin duhsakna a hlan a ni.

Pawan Hans Managing Director MP Singh chuan Mizoram mipui tan theihtawp chhuah a ni ang a ti a. Tunah hian Meghalaya, Sikkim, Tripura leh Nicobar leh Lakhwadeep ah te an service mek a ni a ti.

Tarlan tawh angin helicopter service hi a hmunpui ber Aizawl atangin Mizoram khaw dang 9 ah te a thlawk thin dawn a ni. Helicopter hman man (wet leasing), kum khata Rs.1308 lakhs hi Mizoram sorkarin 25% (Rs.327 lakhs) a tum ang a, abak 75% (Rs.981 lakhs) hi central sorkar Ministry of Home Affairs tum tur a ni. Mi pakhat chuan man hi minute khatah Rs. 50/- a ni bawk ang.

Helicopter service tur hi mi 11 chuan theihna a ni a, amaherawhchu Mizoram awmna hi tuipui zawl (sea level) atanga a san em vangin mi 6 bak phurh theih a nilo a ni.

Helicopter service hawnna, Inaugural flight inkhawm hi Chief Secretary Pu Van Hela Pachuau in a kaihruai a. Ministers, Speaker, Dy Speaker, MLA, Sipai hotute leh official an tel tha hle a ni.

Hawnna inkhawm neih zawh hian a hawn lawm nan (Inaugural Flight) Chief Minister Pu Lal Thanhawla te nupa, Home Minister Pu R.Lalzirliana, Vice Chairman, HPC Lunglei Pu Joseph Lalhimpuia leh MP Singh, MD,Pawan Hans ten Lunglei Kawmzawl-ah thlawkin, Thuampui Helipad-ah an lokir leh a ni.