Vawiin chawhma khan Aizawl Bawrhsap Pisa-ah kan hma lawka Aizawl Veng 3-a Local Council(LC) By Election neih tur chungchangah  District Municipal Election Officer (DMEO) Pu Vanlalngaihsaka, Aizawl Bawrhsap ni bawk chuan a meeting ko a.  He hunah hian Ward pathum -  II/1-Chaltlang, IX/3- Chihinga Veng leh XIII/3-Kanan Veng chhunga Final Electoral Rolls te  chu Municipal Electoral Registration Officer(MERO)  a ruat theuh ten an tlangzarh a ni.

Meeting-ah hian Recognized National leh State Political Party te hmaah  Aizawl Bawrhsap Pu Vanlalngaihsaka chuan  Aizawl Municipal Corporation(AMC) huam chhunga Veng 3-a Local Council By Election atan inpuahchah fel a nih tawh thu a sawi a. He inthlan atana inpuahchahna kalpui dan, voter dahluh belh leh paih chungchang te Asst DMEO  Pu Lalfakzuala, Aizawl District Election Officer ni bawk hnen atangin ngaihthlak a ni leh a. Hemi hnu hian heng Aizawl Veng pathuma Final Electoral Roll te chu tlangzarh a ni.

II/1-Chaltlang atan Pu VL Hruaizela Khiangte, IX/3- Chhinga Veng atan Pu H.Lalrinpuia leh XIII/3-Kanan Veng atan Dr.Andrew H. Vanlaldika te ruat an ni a. II/1-Chaltlang-ah hian In 1217  leh Voter 4881, IX/3- Chhinga Veng-ah hian In 1282 leh Voter 4939, XIII/3-Kanan Veng chhungah In 733 leh Vote nei 2763 a awm a ni.