No.3108/2020-2020

Aizawl, the 15th July 2020 : Vawiin khan Manpower Development Board Vice Chairman leh Aizawl West-I Bialtu MLA ni bawk Pu Zothantluanga chuan kumin HSSLC result chhuaka Aizawl West-I bial chhung atanga zirlai ti tha (Top 10 a tling mi panga) hlawhtlinna chu lawmpuiin, a chenna inah heng zirlai ti tha te hi Laptop, Citation leh pawisa fai te a hlan theuh a ni.

Pu Zothantluanga chuan zirna kawnga intlansiakna nasa tak karah, a Bial Aizawl West-I huam chhung atanga mi 5 lai mai HSSLC Top ten-a tling an nei thei chu thinlung taka a lawmpui thu sawiin an kal zelna turah duhsakna a hlan a. Hemi rual hian zirlai hlawhtling dang zawng zawngte pawh an kal zelna turah duhsakna a hlan bawk a ni. Top ten a tlingte a fuih rualin, kumina zirlai hlawhtling ve ta lo te hnenah pawh, vawiin a an hlawhchhamna te hi nasa leh zuala tan lak tirtu ni thei se a duh thu leh, an hlawhchhamna hi nakina an hlawhtlin ngei theihna tura inbuatsaih nana hmang thiam turin a chah a ni.

Aizawl West I bialtu MLA chuan UPSC Exam-ah Mizo tling an tlem chho zel chu a vei thu sawiin Central YMA in hemi atana hmalakna ni turin Zirna Uar Kum kumpuanah an nei chu lawmawm tiin hei hian zirlai naupang tan chona siam sak se tiin a duh thu a sawi a. Zirlai hlawhtling zawng zawngte chu YMA kumpuan tihlawhtlingtu ni a, nasa leh zuala lehkha zir a, mi hlawhtling ni zui turin leh, UPSC exam te pawh hmachhawn ngam tura inzir zel turin duhsakna hlanin fuihna thu a sawi a ni.

Vawiina zirlai ti tha chawimawi leh thil pek hlan te chu :
1. Lalremsiama Darchhun s/o Vanlalpeka, Tanhril (1st position, Science)
2. H. Sangzampuii d/o H. Lalhmachhuana, Chawlhhmun (6th position, Arts)
3. Lalruattluanga s/o Vannunmawia, Zonuam (6th position, Commerce)
4. Lalruatpuii d/o Vanlalthlana, Sairang (7th position, Commerce)
5. Lalramsanga Sailo s/o Lalhnehliana Sailo, Govt. Complex (10th position, Science) te an ni a.

Vawiin a Aizawl West-I bialtu MLA in, a bial chhung atanga Top ten-a tlingte lawmpuina hun a hmanna hunah hian Tourism leh Sports & Youth Service Board Vice Chairman Pu TC Pachhunga te leh Hnam Run hruaitu dangte an tel a ni.