Vawiin khan Aizawl West I cluster tan Industries department chuan NLUP 2nd installment a pe chhuak ve leh ta a. Local Council 9-a chhungkaw 228 hnenah a vaiin Rs.115,65,300/- sem a ni.

Khuallian Pu R.Selthuama, NLUP Implementing Board (NIB)Chairman chuan India ram state thenkhat, Maharashtra leh Andhra Pradesh ah te loneitute zingah leiba rulh theih loh vanga mahni intihlum tam tak kum tin an awm a, chungte chu an sorkar-in a ngaihsak lem loh laiin Mizoram sorkar chuan kut hnathawktute a ngai pawimawh em em a. Retheihna bawih ata kut hnathawktute chhan chhuah nan ruahmanna fel tak siamin bul tanna tur a thlawnin cheng nuai 1 a pe a, a dawngtuten an vanneih zia an hriat a, din chhuahpui nan an hman ngei a pawimawh hle a ni, a ti. NLUP a kalpui na ah sorkar chu a fimkhur tih sawiin Pu Sela chuan a tahtawlin hnathawhna tur sum hi installment a pek chhuah a ni a. Mi thenkhatin sawisel mah se, sorkar kalpui dan hi a dik zawk a, a tulna lai ah chuan trade thenkhat, Desktop Publishing leh bawnglian vulh thlangtute hnenah te vawi khatah tanpuina hi a hlawma pek nghal a ni, a ti a. Kum 7 chhung zet Mizoram sorkar-in NLUP a kalpui hmasak khan mi hlawhtling tak tak, tun thlenga dinhmun duhawm taka ding mi tam tak an awm laiin mi thenkhat, mahni inbum a, tun thlenga inchhir tak tak leh NLUP sum tlak chhiatpui zawk te pawh an awm tih sawiin Pu Sela chuan West I biala tanpuina dawngtute chu an hma ah duhthlan tur pahnih an nei a ni, a ti a. NLUP chu malsawmna leh anchhia ah chantir theih ve ve a ni, tiin Pu Sela chuan sorkar flagship programme NLUP ah hian “kan Kristianna par chhuak lul rawh se” a ti.

Aizawl District Monitoring Committee Chairman, Lt.Col.Z.S.Zuala pawhin thu sawiin Mizoram-a sorkarna chelhtu party hrang hrang ten mirethei te khai chhuahna tur programme an neihah NLUP chu a danglam bik em em a. State danga la awm ve lo hetiang project thawh nan central sorkarin vaibelchhe 2700 chuang NLUP tan a rawn pe ringawt mai hian central sorkar-in Mizoram sorkar a ngaihsak zia a tilang chiang hle a ni, a ti a. Aizawl West I cluster tan 2nd installment ringawta sum hmanral tur, vaibelchhe 1.156 chu project dang thawh nana hman ni se, hmasawnna hmel lang tham tur a ni, tiin Lt.Col Zuala chuan cheng nuai 1 tanpuina dawngtu ten kan ti hlawhtling lo a nih chuan Mizo leh Kristian tia inchhal pawh a zahthlak hle ang, a ti.

Vawiin ah chuan Govt. Complex atangin chhungkaw 17, Zotlang-48; PTC-1; Sakawrtuichhun-17; Zonuam-34; Chawlhhmun-45; Tanhril-11; Luangmual-34; leh Tuivamit-21 hnenah tanpuina hi sem a ni a. Inkhawm hi Pu J.Hmingthanmawia, Addl D.C. in a kaihruai a, Pu John Saikhuma, General Manager, DIC Aizawl in technical report a pe a; Dr.Robert Rualthankhuma, Project Co-ordinator NIB in lawmthu sawiin inkhawm a khar a ni.