Vawiin khan All India Services Co-ordination Committee chu Arya Mess-ah an thukhawm a, an meeting zawh hian DGP Pu Lalrokhuma Pachuau IPS thlahna programme an hmang nghal a ni. Meeting leh DGP thlahna programme hi Pu Lalnghinglova IAS, Chairman AIS Co-ordination Committee chuan a kaihruai a ni.

Chief Secretary Pu Vanhela Pachuau chuan DGP thlahna programme ah hian DGP Pu Lalrokhuma Pachuau chu ram tana a thawh hlawkzia hriain thinlung taka a kal chhuak tur chu a ui thu sawi a. Ram tana tha tur zawk a ngaituahna ah te, dikna, tumruhna leh taimakna kenkawh a, a hnathawhna ah te a fakawm em em a ti. Chief Secretary chuan police inthununna kawng hrang hrang khawng taka a kenkawh thei leh a awm chhunga hmingchhe miah lova, a chhuak te hi a entawntlak hle a ni a ti bawk. Chief Secretary chuan vawiina All India Services officer kalkhawmte chu an hna ah theihtawp chhuah turin a fuih a, mipuiin officer ni tlak in an hmu em tih teh pawh ngaihtuah fo a tul thu a sawi bawk a ni.

DGP Pu Lalrokhuma Pachuau chuan Pathian kaihhruaina a hetiang ka thleng hi ka lawm hle a tiin a thawhpui te leh Sawrkar chunga lawmthu a sawi bawk a ni. Dr. S S Garbyal, IFS PCCF leh Principal Secretary chuan Pu Lalrokhuma Pachuau hi ngaihhruina (memento) a hlan a ni.

Pu Lalrokhuma Pachuau hi March ni 1, 1955 khan a piang a, NEHU atanga BA(Hons) a zawh hnu in kum 1977 khan IPS zawm in Karnataka cadre a ni a. Karnataka hmun hrang hrang ah te SP hna a chelh hnu in, DIGP Anti-Terrorist Cell, DIGP Intelligence, DIGP Forest Cell, DIGP (Administration), Addl. Commissioner of Police Bangalore City, IGP DCRE leh IGP North-Eastern Range Gulberga hna te a chelh leh a. Executive Director, Karnataka State Police Housing Corporation Ltd hna a chelh lai hian police quarters hrang hrang sak lai 5000 chuang hneh takin a lo enkawl a. He hna a chelh lai hian a kaisang ADGP ah a kaisang a. Mizoram DGP hna a chelh hma hian ADGP Karnataka Lok Ayukta hna a chelh a ni.

Pu Lalrokhuma Pachuau hian Mizoram DGP hna hi October ni 9, 2007 khan a chelh tan a ni. Hemi hma hian Mizoramah tum hnih lai a awm a, September ni 24, 1987 leh October ni 14 1988 inkar khan Commandant a a awm lai in 2nd MAP Lunglei chu din a lo ni a. Aizawl SP in October ni 14 1988 leh October ni 10, 1991 inkar khan a awm bawk a ni.

Pu Lalrokhuma Pachuau hian chawimawina hrang hrang a lo dawn tawh a, chungte chu Mizoram Police(Special Duty) Medal 1990; Indian Police Medal for Meritorious Service 1996 leh President’s Police Medal for Distinguished Service 2004 te a ni.

A nupui Pi Lalmuankimi nen hian fapa pathum an nei a, an fapa upa ber hiam IIM Indore ah MBA a zir mek a ni a ni.