Vawiin khan Aizawl West I leh West II Cluster tan Dinthar Veng YMA hall-ah NLUP tanpuina puanthui khawl leh agarbati kuang siamna khawl te pek chhuah a ni ve leh ta a. Mi 112 hnenah puanthui khawl chi thum leh sum Rs. 39,28,410/- pek chhuah a ni a. Mi 29 hnenah agarbati kuang siamna khawl 2 theuh leh Rs. 15,000/- theuhva an chan turin Rs.4,35,000/- sem chhuah a ni a. Aizawl South II bialtu MLA, Lt.Col.Z.S.Zuala, Aizawl District NLUP Monitoring Committee Chairman chu khuallian a ni.

Industries department hnuaia Tailoring thlangtute hi puanthui khawl changkang, Janome pek vek an ni a. Overlock machine leh kekhawl erawh chu an mamawh dan azira pek an niin khawl nei sa te chuan sum faiin tanpuina hi an dawng thung a ni.

Lt.Col.Z.S.Zuala chuan Mizoram sorkar budget-a a tam ber chu mirethei te chanpual atan dah a ni tih sawiin eizawnna rahbi tuk nan heti zat sum sorkar-in a pek te chuan NLUP ti hlawhtling tur hian sorkar ah leh mipui ah chauh ni lovin, Pathian lakah pawh mawhphurhna lian tak an nei a ni, a ti a. NLUP kalpui nan central sorkar-in kum 5 atan vaibelchhe 2873.13 a ruahman chu hman that a nih loh chuan tihtawp theih a ni tih sawiin hetiang zat sum sawi chhuah leh hi a harsa hle ang, a ti a.Tanpuina dawngtute chu hun tha bawh pelh lova, theihtawp chhuah turin a chah.

NLUP semna inkhawm hi NLUP Implementing Board Chairman Pu R.Selthuama’n a kaihruai a. Tanpuina dawngtute chu khawl hman dan entirna, demonstaration neihpui an ni.