Vawiin khan Aizawl West II cluster-a veng 6-ah Industries Department hnuaia NLUP tanpuina 2nd installment chu NLUP Implementing Board Chairman Pu R. Selthuama’n Dinthar YMA Hall-ah a sem a. Aizawl District Monitoring Committee Chairman, MLA Lt. Col. Z.S Zuala pawh NLUP semna inkhawmah hian a tel ve.

Pu R. Selthuama chuan sorkar chuan a lo sawi lawk tawh ang ngeiin NLUP tanpuina sum a sem tawh a, a tihtur a hlen tawh, tunah chuan a dawngtu ten a hlawhtlin ngei theihna tura an thawh hi an bat ani ve thung, a ti. NLUP dawngtute chu thahnemngai leh taima taka thawk tura fuihin a hmanna tur dik tak a hmanglo chuan sorkar an bum a ni lova, anmahni leh anmahni an inbum a ni zawk, a ti bawk.

Aizawl West II cluster-ah hian Dinthar veng atangin chhungkaw 130, Tuikual North- ah chhungkaw 84, Vaivakawn-ah chhungkaw 79, Tuikual South-ah chhungkaw 77, Dawrpui Vengthar-ah chhungkaw 71 leh Kanan veng atangin chhungkaw 45, an vaiin chhungkaw 486 te hnenah Rs. 244,24,300/- sem a ni. Vawiina Industries hnuaia NLUP dawngtu te hi Automobile repairing works; Beauty Parlour; thirdeng; buh herkhawl; Chow siam; DRP; Electronics Repairing; Lumet; Chhang siam; Leather & Hood Works; Petty Trade-I,II,III leh IV; Photo & Video; Pheikhawk siam; Steel Fabrication leh Tinkhawr trade thlangtu te an ni.

Vawiina NLUP sem inkhawm, Addl. D.C Pu J.Hmingthanmawia kaihhruaiah hian Pu John Saikhuma General Manager, DIC Aizawl in technical report a pe a, NLUP Implementing Board Project Coordinator Dr. Robert Rualthankhuma’n lawmthu sawiin hun hnung a khar a ni.