Central Information Commission-a Chief Information Commissioner (CIC) Pu Satyananda Mishra chuan ni hnih chamin Mizoram a rawn tlawh mek a; vawiin zing dar 10.00 khan Governor Pu Vakkom Purusothaman nena an inkawm hnuin, Mizoram Information Commission pisa leh State Museum te a tlawh a ni.

Governor Pu Vakkom Purushothaman chuan Right to Information (RTI) Act avangin sawrkar kalphung leh hnathawhte chik zawkin mipuiin an the thei ta a, thil fello tam tak RTI avanga haichhuah a ni thin chu India ram pum tan a tha zawnga inher danglamna a nih thu a sawi a. Central CIC Pu Satyananda Mishra pawhin, “Mi tam takin Information Commission-te chu sawrkar duh dan ang zela rorel thinah min ruat a, hei hi ngaihdan dik lo a ni a. RTI hmanga thil diklo haichhuah avanga hremna tawk sawi tur tam tak an awm bakah, Information Commission-in sawrkar kalphung tha lo kalha ro a rel pawh sawi tur a tam a ni” a ti. Governor leh Central CIC inkawmnaah hian Pu Lal M. Dingliana IFS (Retd.), Chief Information Commissioner, Mizoram chuan a tawiawm a ni.

Vawiin chawhma dar 11.00 khan Central CIC Pu Satyananda Mishra hian Mizoram Information Commission pisa a tlawh a; an hnathawh dan kalphung leh harsatnate Mizoram CIC leh officer-te nen khunkhan takin an sawiho a ni. Central CIC chuan thurawn chi hrang hrang a pek rualin, “Thingtlang khuaah RTI form chi hrang hrang hman mai theih tura chhawp a tha a; anmahni khuaa sawrkar hmalaknaah hriatfiah duh an neih pawhin rang zawk leh awlsam zawkin an zawtfiah thei dawn a. Tin, sawrkar hnathawkte hi a thlawna ram leh mipuite rawngbawltu an ni lo va; an duty an ti a ni mai zawk. Chuvangin, mahni duty thawk thalote dapchhuah nan RTI Act hi uar zawkin Mizoram-ah hman a tul hle a ni” a ti. India ram hmun dangte ang bawkin corruption chuan Mizoram pawh a hmaih bik loh a rin thu Central CIC chuan sawiin, “An ni tin khawsak tisang em em te leh an fate phai lama nuamsa taka khawsaktir theite hian an thla bi hlawh chauh an ring lo deuh a ni thei” a ti bawk. Mizoram Information Commission-a Chief Information Commissioner chauh awm chu RTI Act, bung 15, section 2 sawi dan nen a inmil loh avangin a rang lama Commissioner ruat belh tura Chief Minister sawipui a tum thu pawh Central CIC hian a sawi lang a; mipuiten RTI an hmelhriat lehzual theihna tura ngawrh lehzuala campaign tul a tih thu a sawi rualin, YMA-te nena Mizoram Information Commission an inthurual thin chu lawmawm a tih thu a sawi lang bawk.

Mizoram Chief Information Commissioner Pu Lal M.Dingliana pawhin an harsatnate leh an hnathawh dan phung te leh hmachhawpte Central CIC hnenah hian a hrilhfiah a. “Mizoram Information Commission hnenah hian nikum chhungin zawhna 600 vel leh complaint 18 leh appeal 5 a lut a. Kuminah ngawrh lehzualin RTI chungchang hi mipuite hnenah zirtir kan tum a; chak lehzuala hna kan thawh theihna tur chuan Dan hremi kan mamawh a ni” a ti.

Central Chief Information Commissioner hian State Museum a tlawh a; Mizo thilhlui phochhuahte chu an nupa tana hriatna tizautu leh beng tivartu a nih thu a sawi. Naktuk zing dar 10.00 –ah Chief Minister Pu Lal Thanhawla chu a bangle-ah a kawm ang a; dar 11.30-ah I&PR Auditorium-ah Central leh State sawrkar-a senior officer-te hnenah thuchah a sawi ang. Central CIC hi zanin hian Pu Lal M. Dingliana chuan Zote Complex-ah zanriah a buatsaihsak ang a ; nak zanah Chief Minister Pu Lal Thanhawla\'n a bungalow ah zanriah a kilpui ang