2483/2026-2027 

Aizawl, the 1st of October, 2026 : Vawiin chhun khan Pu Lalnghinglova Hmar, Minister of State (i/c) Sports & Youth Services, Tourism, LESDE, Excise & Narcotics leh Aizawl West II Assembly Constituency bialtu MLA ni bawk chuan a bial chhung Dawrpui Vengthar leh Tuikual South-ah te Khawvel Pum Huap Upate Ni (International Day of Older Persons) chu Mizoram Upa Pawlte a hmanpui a, Kum Upate Ni lawmpuina a hlan.

Kum Upate Ni lawmna a khuallian Pu Lalnghinglova Hmar chuan kum upate chu Mizo hnam tana mi hlu an ni tiin a sawi a. "Thil tam tak kan hriatte, kan hnam kalphung leh kan hnam in thil tha tak tak kan neihte hi min zirtirtu in ni a. Aia upa zahte, kan lengkhawm hla tha tak takte leh Mizo thil hlu tam tak hretute in ni. Tunlaiah changkanna kan velah tam tawh mahse kan pi leh pute min zirtir aia thil hlu hi a la awm lo." a ti.

"Kum upate hi kan hlut avang takin kumin Khawvel Huap Upate Ni thupui angin damrei leh hrisel zawka nun kan hman theihnan tan kan la ang. Khawchhak leh khawthlang ramte nena tehkhinin dam rei zawng an chhut danah Mizote hi kan dam chhung a rei lo bik a, hengte hi thalaite thihna leh vanduai vangte leh chhan hrang hrangte avang ni bawk mahse, kan nitin nun hmandan in a nghawng natna kan neih in a nghawng a tel ve a ni. Heng avangte hian kan phak ang tawkah taksa insawizawi kan ngaih pawimawh a tul." a ti a. "Kan kum a tam tak deuh avang maiin tar angin kan awm lovang a, kan phak ang tawk zelin kan che tam ang." tiin a sawi.

Bialtu MLA Pu Tetea Hmar chuan a bial chhungah harsa zawkte ngaihsak an tul thu sawi bawkin, chhungkaw thenkhat harsatna tawkte an lo awm chuan baihvai taka an awm loh nan tan lakpui turin a sawm a. Mamawh zawng zawngah inpuih vek theih a nih loh pawhin MUP kaltlangin a theih anga inngaihven zel a pawimawh thu leh, hemi kawnga thawhpui turin a sawm bawk a ni.

Vawiin Kum Upate Ni lawmna hi Dawrpui Vengthar Branch hian Dawrpui Vengthar Presbyterian Kohhran Hall-ah an hmang a. Lawmpuina hunah hian an member kum 90 chunglam lawmpuina mi 16 hnenah an hlan a. An member kumin chhunga thi te sunna hun an hmang bawk.

Tuikual South hian Tuikual South Jubilee Run-ah neih a ni a. Anni hian Kum Upate Ni lawmna bakah hian an kum 37-na champha an lawm nghal a ni. Tin, Art & Culture Department leh MUP General Headquarters buatsaih Lengkhawm zai intihsiak a an area bik intihsiaknaah pakhatna an lak chu an lawm tel a bawk.