2482/2026-2027

Dated Hnahthial, the 1st October, 2026: Vawiin chawhma khan Superintendent of Police Office, Hnahthial-ah, Hnahthial District Executive Force (DEF) huam chhunga Police Officer te chuan Crime Review Meeting neiin SP, Pu Manjeet Singh Sankhla IPS chuan a kaihruai a ni a, kumin January atanga September ni 30 chhung khan Hnahthial District-ah Case sawmthum pathum (33 cases) ziah luh a nih tawh thu tarlan a ni.

Meeting-ah hian Hnahthial District crime dinhmun leh thubuai kal mek te uluk taka thlirlet a ni a. Tarlan danin kumin January atanga September ni 30 chhung khan Hnahthial District-ah Case sawmthum pathum (33 cases) ziah luh tawh niin Burglary case pakua (9) register tawh a ni a, mihring panga (5) man an ni bawk. Theft case pasarih (7) register tawh a ni a, mihring pasarih (7) man an ni bawk. ND&PS case pali (4) register niin mihring pariat (8) man an ni a, Arms Act case pahnih (2) register niin mihring panga (5) man an ni. POCSO case pali (4) register niin mihring panga (5) man an ni a, Fatal Accident (road accient) Case pahnih (2) register tawh niin mihring pakhat (1) man a ni. Grievous hurt case pakhat (1) register niin mihring pakhat (1) man a ni a, MLP Act case pali (4) register niin mihring panga (5) man an ni bawk.

Superintendent of Police chuan pending case-te chu rang taka chhui chhuak a, a hunbi a chargesheet tur a nih thu a sawi a, Investigating Officer-te chu case chhui kawngah uluk leh zuala hnathawk tur leh dan leh thupek kalpui turin a hrilh a ni.

Meeting-ah hian crime venna, Police leh mipui thawhhona tha zawk leh crime thlen hunah hmanhmawh taka hmalak pawimawhzia pawh sawi ho niin SP chuan Officer zawng zawngte chu District chhungah remna leh muanna leh mipui himna kawnga an mawhphurhnate tha taka hlen turin a ti bawk.

He meeting-ah hian Pu Robert S. Beihrosa, Addl. SP; FC Zonghinga, SDPO; Inspector Pu Lalchhuanmawia, OC, Hnahthial PS; SI Kam Thanga, OC, Thingsai PS leh Case I/O SI pahnih leh ASI pahnih an tel a ni.