Vawiin khan Deputy Speaker Pu R. Lalrinawma chuan Aizawl West-III Area MUP Conference vawi 5-na, Khatla South YMA Hall a neih chu hmanpuiin, Upa te chu thangtharten nun ziarang zirna atan an en ber an nih avangin tunlai a Mizoten zir tur pawimawh tak tak kan neihah te hmalatu ni thei turin a chah a ni.

Deputy Speaker chuan kalkhawmte hnenah chuan Mizo culture chhawmnun kawnga an thawhna te chu hlu a tih thu a sawi a. Mizote hi pi pute hunah chuan mi taima leh intodelh tum tlat thin hnam ni mah ila, tunah chuan thawk lova a thlawn a neih tum kan tam ta hle a; Sorkar chu mipuite tan a din, mipuite mamawh petu tur ni mahse, mipuiten sorkar hi ta neiha an neihlohva, mahni a tih ve theih thil te ber thlenga sorkar tih tura an dah chhung chuan chawmhlawm state kan ni reng mai dawn a ni, tiin Pu R. Lalrinawma chuan taimak, fimkhur leh inremchem zir thar a tulzia a sawi a ni.

Vawiin Aizawl West-III Area MUP Conference hawnna inkhawm hi rorel in a zui a ni.