PHE Department-in National Rural Drinking Water & Sanitation Awareness Campaign a buatsaih kal mekah a ni thumna atan vawiin chawhma dar11:00 khan a vawikhatna atanMizorampumaVillageWater & Sanitation Committee Meet 2014 chu Vanapa Hall-ah hman a ni.

Hawnnaah hian inkhawm, Er. Lalmuanzova, C.E., Zone-I, PHE Dept.kaihhruaiah hian khuallian Er. R. Lalfanliana, E-in-C, PHE Dept. chuan a hawnna thu sawiin khaw hrang hranga tuihna thate a kam zel vanga duhkhawp kan hmuh loh tial tial chhan hrang hrang a sawi a; sik leh sa inthlak danglam chak lutuk vang te, ram ngaw tih chereu leh mihring khawsak sang ta lutuk te'n harsatna min thlen mek thu a sawi a, hei vang hian tuihnar kan neih ang chhun chhunte chu humhalh a, ti bawlhhlawh lova a tha thei ang bera venghim turin kalkhawmte a sawm a ni. 1997 leh 1998inkar khan Sorkar laipui chuan tui leh faina enkawlna chungchangah neitu chan chang taka mipuite an awm ve theihna tur ngaihtuahin hma a la tan a, tunah hian hlawhtling takin VWSC hi khawtin deuh thawhah a ding tawh a ti a, PHE Department leh VWSC-te thuk lehzawka hnathawh dan tur duan mek a nih thu leh Sorkarin a pawmpui chuan reiloteah hmalak vat a nih tur thu a sawi bawk.

Chawhnu lamah mi pathum paper buatsaih ngaihthlakna hun hman a ni a, he hunah hian Er. Lalrothanga, Director, CCDU, PHE Department chuan 'VWSC- The Way Forward' tih thupui hmangin paper a buatsaih a, hetah hian VWSC kal dantur te, an hmalakna tur te leh an chanvo te a hrilh a, Department nen tangruala hmala tawn turin a fuih a ni. Pu Lalrinmawia (IFS), Conservator of Forest (Wildlife) chuan 'Forest for Sustainable Development of Mizoram' tih thupui hmangin kalkhawmte chu thing leh mau humhalh a tulzia te, ramngaw nei ramten tui chungchangah harsatna an neih lohzia leh Mizoram ram ngaw neih tlem tawh ziate tarlangin nakin lawka harsatna kan tawh mai lohnan ramngaw humhalh tulzia nasa takin a sawi a ni. Paper buatsaihtu hnuhungber Er. Dunglena, Commissioner, PWD & PHED (Retd.) chuan 'Rainwater Harvesting' tih thupui hmangin palaite chu ruahtui khawlkhawm kawnga tanla turin a hrilh a, khawvelina tui hnar kan neih that ber pakhat a nih thu sawiin, awlsam taka tih theih a nih laia tui dahkhawlna lama mipui nawlpui kan harhchhuah a tul tawhziate a tarlang a, fur ruahtui khawl tuten thalah harsatna an neih ngai lohte a tarlang bawk.

Banna neih hmain 'Open House' hun hman a ni a, hetah hian kalkhawmten anmahni khua theuhah hmalakna anlo neih dan te, harsatna an tawh dan te leh kal leh zel an tum dante sawiin hun hlimawm tak an hmang a, naktuk chawhma dar 10 hian a ni hnihna hman leh a ni ang.

Meet ni hnihna hi Dt.28.2.2014 hian Vanapa Hall-ah tho chawhma dar 10:00-ah hman leh tur a ni dawn a. He hunah hian Dr. Pachuau Lalmalasawma, Nodal Officer (IDSP) in 'Linkage between Water, Sanitation & Health' tih paper a buatsaih te, Pu P.C. Biakmawia, Chief Chemist, SRI, PHED, buatsaih ' Water Quality Monitoring & Surveillance' te, Er. C. Zirkhuma, State Coordinator, CCDU, PHED paper buatsaih 'Nirmal Bharat Abhiyan' tih te leh Er. Helen Rodingliani, E.E.(M), PHED, paper buatsaih 'Solid & Liquid Waste Management' te zirho leh a ni ang a, 'Open House' hun hman leh a ni bawk ang.