12/2023-2024

Aizawl, the 3rd April 2023: Environment, Forests & Climate Change Department, Mizoram chuan a hnuaia an thuchhuah ang hian Aizawl Zoo a dah tur Sakei (Royal Bengal Tiger) pahnih a lakbelh.

Environment, Forests & Climate Change Department, Mizoram chuan Aizawl Zoological Park-a dah tur Sakei (Royal Bengal Tiger) pahnih a lak belh leh ta.

Heng sakei pahnih la tur hian Aizawl Zoological Park Range Officer, Pu Immanuel-a leh Vety Officer, Dr. Rosangzuali Chhakchhuak te kaihhruaiin mi paruk an kal a. Aizawl atangin ni 21.03.2023 zingah chhuakin ni 24.03.2023 zingah Bhubaneswar an thleng thla a, sakei phurhna tur engkim an ruahman fel vek hnu-in ni 27.03.2023 khan Nandankanan Zoological Park rawn chhuahsanin ni 31.03.2023, Zirtawpni khan Aizawl Zoological Park an rawn phur thleng ta a ni.

Tun tuma sakei lak tharte hi a nu leh a pa a ni a, a pa hi a hming Kundan niin a nu hi Adyasha a ni ve thung, inthlah pung thei tura beisei an ni.

Tun tuma sakei lak tharte hi hun engemaw chen chu dah hran an ni rih dawn a, mipui en theih tura phochhuah thuai tum a ni a, a hun tur tak erawh hriat theih a la ni rih lo.

Heti hian tun dinhmunah Aizawl Zoological Park-ah hian Sakei pathum an awm ta a ni.